Pacific Islands Forum (PIF) i gat nupela Seketeri Jenerel. Man husat i kisim dispela wok nau em Henry Puna, husat i bin praim minista bilong Cook Islands bipo.

Dispela resis bilong sia bilong Seketeri Jeneral i bin kamap namel long Cook Islands na kendidet bilong Micronesia, Gerald Zackious.  

Resis tu em i klostu tu taim Ambassador Zackious i kisim 8-pela vot na Mista Puna i win long 9-pela vot.

Tasol win bilong Mista Puna i lukim ol lida bilong Micronesia i no wanbel na ol i toktok strong long lusim PIF.

Solmon Ailan tu i putim kendidet bilong ol, sinia gavman opisa, Dr Jimmie Rodgers, tasol em i no kisim wanpela vot long namba 2 raun bilong vot.