OL yangpela pipel long Pasifik i ken gat bikpela influens sapos ol i yusim gut ol sosel midia platfom long kirapim awenes long ol kain kain hevi long rijon.

Dispela em i toktok bilong Mis Solomon Ailan, Gladys Habu husat i kamap wanpela mausmeri bilong ol hevi bilong klaimet senis long kantri bilong em.

Ms Habu i tok taim em i bin gat 14 krismas tasol, em i bin lukim solwara i karampim hap ples bilong ol tumbuna bilong em long Isobel ailan. Em i tok dispela hevi i kirapim tingting bilong em long yusim sosel midia long toktok strong long dispela hevi bilong klaimet senis.

Em i kisim wanpela bikpela luksave bilong Her Majesty Queen Elizabeth II, het bilong Commonwealth, long dispela awenes wok bilong em.

Em i kamap namba168 meri long Commonwealth Points of Light awot long luksave long promotim wok bilong envairomen.