TROPIKAL saiklon Harold i bin wanpela bikpela hevi tru i bungim ol pipel bilong Vanuatu las yia taim ol arapela kantri long wol i bungim bikpela hevi bilong COVID-19.

Long dispela taim saiklon Harold i bin bagarapim sampela ples long Vanuatu, kantri i no bin kisim ol kain sapot we em i save kisim long ol intenesenel ogenaisesen. Tasol dispela hevi  i strongim ol helpim na rilif wok we ol i yusim ol lokal savelain husat i bin go pas long disasta menesmen insait long kantri.

Linda Kenni i wok insait long disasta menesmen long Vanuatu. Em i tok, taim COVID-19 i bin kamap, ol travel restriksen i mekim hat tru long ol ovasis patna i go insait long kantri long helpim. Tasol em i tok, ol pipel i ogenaisim ol yet na wok long helpim long taim bilong sailon Harold.

Ms Kenni i tok planti taim, ol liklik kantri long Pasifik i save putim ai tumas long ol ovasis kantri long sapotim ol. Tasol em i tok i gutpela moa long yusim lokal save manmeri na ol gavman ejensi long mekim ol wok long taim bilong disasta.

Linda Kenni i toktok long disasta menesmen long Vanuatu na olsem wanem ol pipel i strongim wok long helpim ol tarangu long taim bilong COVID-19.