HELT MINISTA bilong Sri Lanka, husat i wok long promotim soseri na ol mejik wara long stopim sik COVID-19 i kisim dispela sik nau. Nius ripot i tok Pavithra Wanniarachchi i bin kisim test bilong COVID-9 na test i soim olsem em i gat sik na nau em i stap long lokdaun.

Pavithra Wanniarachchi i bin kamap long pablik na promotim wanpela mejik marasin em i tok inap long stopim dispela sik. O saintis i bin testim na tok dispela mejik marasin em i hani na natmeg tasol. Wanpela glasman i bin wokim dispela marasin na helt minista i promotim olsem marasin bilong stopim COVID-19.

Em i bin kapsaitim tu wanpela sospen "holi" wara i go insait long wanpela riva long mun Novemba bihain long wanpela glasman i tokim em olsem dispela wara bai pinisim dispela sik COVID-19.

Populesen bilong Sri Lanka em i stap long 21 milien pipel. Long las wik Fraide, gavaman bilong kantri i givim tok orait long baim Oxford-AstraZeneca veksin, bihain tasol long test i soim olsem Ms Wanniarachchi i gat COVID-19.

"Test bilong em long Fride i soim olsem em i positiv olsem na em wantaim ol lain i save stap wantaim em bai i mas stap long lokdaun nau," wanpela opisa bilong helt ministri i tok.

"Olgeta lain i stap wantaim em tu i mas stap long kwarentin"

Narapela junia minista husat i bin dringim dispela marasin Ms Wanniarachchi i wok long promotim, i bin kisim tu COVID-19 long dispela wik.

Ol dokta long kantri i tokaut strong nau olsem ol saintis i no painim wanpela samting i soim olsem dispela marasin inap long stopim COVID-19.

Tasol planti tausen manmeri i wok long pulim lain i go long wanpela ples long sentral Sri Lanka long kisim dispela marasin.

Ol helt opisa bilong Sri Lankan i kisim trening bilong givim dispela sut marasin em gavman i tok orait long baim long Oxford-AstraZeneca. (AP: Eranga Jayawardena)

Ol famili bilong narapela politisen tu i bin kisim COVID-19 bihain long ol i dringim dispela marasin.

Ol gavman midia i bin promotim tru dispela glasman husat i tok em Kali i bin givim em dispela marasin. Kali em i wanpela meri god bilong ol Hindu. Em i save kamapim indai na bagarap.

Tasol nau gavman bilong Sri Lanka stap longwe long dispela glasman. Ol i tok tredisinel marasin yunit bilong ol i bin givim tok orait long yusim dispela marasin olsem fud saplamen.

Sri Lanka i gat planti manmeri tru i kisim coronavirus. Long mun Oktoba, namba bilong ol sikmanmeri i bin stap long 3,300 na 13 pipel i bin dai. Long dispela wik, namba i surik i go anap long 57,000 na 278 pipel i bin dai.