YAKU Ninich-Omotosho em i bilong Morobe na Oro provins na nau em i stap long North Carolina, USA, wantaim famili bilong em. Em i tok em i amamas long Kamala Harris i kamap namba wan meri Vais Presiden long Amerika.

Las wik em wantaim famili bilong em i lukim 46th Presiden Joe Biden na Vais Presiden Kamala Harris i kamap nupela lida bilong Amerika. Famili bilong em i bin votim tupela.

Mama bilong Madam vais presiden Harris em i bilong India na papa bilong em i bilong Jamaica. Tupela i bin bung long Amerika na marit taim tupela i yangpela yet.

Papa bilong em i bin wanpela ikonomis na profesa long yunivesiti na mama bilong em Shyamala Gopalan Harris em bin stap wanpela baio medikol saintis. Tasol marit bilong tupela i bin bruk long taim Harris em i likik yet. Mama bilong em i bin dai long 2009 na papa bilong em ritaia na i stap yet long Amerika.

Presiden Biden i bin stap vais presiden bipo taim Barrak Obama i bin stap presiden.

Yaku Ninich-Omotosho i bin stori wantaim Radio Australia long dispela bikpela de bilong politiks long Amerika, na tu long famili bilong em.

PNG meri Yaku Ninich-Omotosho long North Carolina