GAVMAN bilong Nu Silan i tokaut long dispela wik olsem ol i painim keis bilong COVID-19 gen long komyuniti. I no bin gat wanpela ripot bilong COVID-19 long Nu Silan long mun Novemba i kam inap nau.

Ol ripot i tok dispela nupela keis em wanpela meri husat i bin go raun long Spain na Netherlands. Ol helt woka i mekim wok bilong testim o arapela manmeri husat i bin stap klostu long en, tasol i no gat ripot long dispela sik i kalap i go long ol arapela pipel.

• Ol i bin testim dispela meri tupela taim long taim em i stap long kwarentin long hotel na tupela test i soim olsem em i no gat COVID-19.
• Ol helt opisa i sekap long lukim sapos em i kisim sik long narapela man husat i bin raun ovasis na i kam bek long Nu Silan.
• Ol i putim presa nau long Praim Minista Jacinda Ardern long givim sut bilong coronavirus long populesen bilong kantri nau.

Dairekta-jeneral bilong Helt Ashley Bloomfield i tok dispela meri husat i gat 56 krisma i bin kam bek long Yurop na i bin stap long kwarentin long Pullman Hotel long Auckland.

Em i bin stap 14 de long kwarentin na tupela taim ol i testim em tasol em i no gat vairus na ol i larim em i go bek long haus bilong em long 13 Janueri. Bihain nau em i bin pilim sik na ol i testim em gen na lukim olsem em i gat COVID-9.

Ol i tok dispela meri i bin gat rekot bilong ol ples we em i bin go long en na ol pipel em i bin bungim olsem na i isi long sekap long ol lain tu.

Populesen bilong Nu Silan em 5 milien pipel na i kam inap nau, ol i bin lukim 1,927 pipel tasol i kisim dispela sik.

I gat moa pipel i wok long go bek long Nu Silan nau olsem na bikpela presa i stap long Praim Mninista Jacinda Arden i tok orait long givim sut long ol pipel. Ol i wari long strongpela kain coronavirus em ol i bin painim long Saut Afrika i go kamap long Nu Silan.

Gavman i tok bai olgeta pipel long Nu Silan i kisim sut long namba tu hap bilong yia.

Gavman i laik opim rot bilong ol lain i go kam namel long Nu Silan na long Australia tasol.

ABC/wires