I GAT ol toktok na tok sori tu i kamap namel long ol sesenel fam woka komyuniti long Australia bihain long wanpela yangpela frut pika bilong Timor Leste i bin dai long kar eksiden long Tasmania.

Wokpainim bilong ol polis long dispela birua i soim olsem dispela man i no bin pasim sitbelt bilong em.

Dai bilong dispela man i mekim namba bilong ol lain sisenel wok husat i dai, i surik i go antap. Na ol komyuniti i wari long dispela hevi.

I gat bikpepla nid bilong ol woka long ol fam long Australia. Olsem na ol i wok long kisim planti lain long Pasifik long go wok long ol fam. Tasol i gat bikpela toklukaut i go i long ol dispela sisenel woka long lukaut gut sapos ol i laik draivim kar long Australia.

Wanpela Ni-Van fam woka, James Walau, i bin go wok long ol fam long 2019 long New South Wales. Em i tok ol sisenel woka i mas luksave olsem ol rot bilong draivim kar long ol Pasifik kantri i no wankain olsem Australia.

Em i tok tu olsem ol i mas kisim trening long dravim kar long Australia yet pastaim long ol i ken draiv long kantri.