PLANTI hap long ol rural komyuniti long Papua Niugini, i no save kisim gutpela gavman sevis olsem na wanpela yangpela lo sumatin i go aut long bringim stori bilong ol pipel.

Solomon Momiya Aplas em i blong Wes Sepik provins na em i stadi long lo long University of Papua New Guinea. Tasol bikpela intres bilong em tu i stap long wok bilong edvokesi na em i yusim sosel media long mekim dispela awenes wok.

Em i bin kisim wanpela askim long ol pipel bilong Aitape Lumi long Is Sepik long go insait long distrik na lukim hevi ol pipel i save bungim na tokaut long ol dispela hevi bilong ol pipel.

Ol poto na video em i bin mekim long dispela wokabaut bilong em, i bin kisim planti bekim long Facebook. Em i tok bikpela astingting bilong em nau em long ol lida i mas luksave long hevi ol pipel.