LONG ol kantri long Melanesia, planti moa pipel i save stap long ol rural komyuniti long ples we laip bilong ol i pas long ol risos long bus, wara na solwara bilong ol.

Tasol ol kain kain nupela divelopmen olsem loging na maining i save bagarapim ples na ol pipel i save bungim planti hevi long en.

Wanpela NGO grup husat i wok long mekim ol awenes long ol komyuniti long Papua Niugini, na ol narapela kantri olsem Solomon Ailan, Vanuatu, Fiji na tu long Wes Papua, long promotim sastenabel developmen. Dispela NGO grup em Partners With Melanesians.

Ekseketiv Dairekta na senia polisi opisa bilong Partners With Melanesians, Kenn Mondiai i tok COVID-19 i bin afektim wok bilong ol long 2020.

Tasol Mista Mondiai i tok ol i stretim pinis 4-pela namba wan program we ol bai lukluk long en long PNG long dispela yia, 2021.