LONG taim ol saveman i mekim wok painim long dispela birua i bin kamap long Sriwijaya
Air flight 182, bai ol i skelim tu operating rekot bilong Sriwijaya.

"Sefti rekot bilong en i bin miks," Greg Waldron, Asia menesing edita long FlightGlobal i bin
tok.
Em i tok namel long 2008 na 2012, ol tripela 737 balus bilong kampani i bin kisim bagarap
bihain long ol i kam daun long ples balus tasol balus i abrusim ranwe na i go bam. Long
dispela hevi bilong 2008, wanpela pasindia i bin dai na 14 arapela i bin kisim bagarap.
Long pinis bilong 2019, Sriwijaya i bin pinisim wan yia wokbung wantaim bikpela balus
kampani, Garuda Indonesia na i wok long mekim ol wok bilong en yet.

Ol i painim ol dispela samting long hap we balus bilong Sriwijaya Air i bin pundaun.
Bipo long Sriwijaya Air i bin pinis wokbung wantaim Garuda, Transpot Ministri i bin stopim
moa long hap namba bilong ol balus bilong Sriwijaya bikos ol i wari long sefti bilong ol
dispela balus.
Tasol sif ekseketiv bilong Sriwijaya i tok long Sarere olsem dispela balus i bin pundaun, i bin
orait.
Long taim bilong COVID-19, Sriwijaya wantaim planti balus kampani i bin katim bek planti
wok na ol wokmanmeri bilong ol, na ol saveman bai glasim ol dispela samting tu long taim ol
i mekim wok painim long dispela birua i bin kamap long Flight 182."

Ol hevi em dispela pandemik i bringim i bin salensim tu sefti bilong ol balus," Chappy
Hakim, wanpela Indonesia saveman bilong ol balus i tok. Bipo em i bin wanpela opis long air
fos.
"Sampela eksampel em ol kampani i katim bek namba bilong ol pailot na ol teknisen, ol i no
baim ful pe long ol wokman na ol i larim ol balus i sindaun nating i stap long graun.”