WANPELA saveman bilong intensenel politiks long Yunivesiti bilong Hawaii, i tok ol hevi
ol sapota bilong Presiden Donald Trump i bin mekim long Capitol Hill palamen bilong
United States, i ken kamap tu long Pasifik.

Dairekta bilong Centre for Pacific Islands Studies long University bilong Hawaii, Dr
Tarcicius Tara Kabutaulaka, i tok planti pipel long ol kantri long Pasifik i no winim ol
bikpela skul olsem ol lain Amerika, olsem na em i isi tru long sampela lida i sutim bel bilong
ol long kamapim kain trabel i bin kamap insait long palamen bilong Amerika las wik.
Ol lida bilong Democrat pati long House of Representatives wantaim sampela memba bilong
Republicans pati i laik rausim Presiden Trump bihain long em i sutim bel bilong ol sapota
bilnog ol long mas go long palamen haus na soim olsem ol i no amamas long risal bilong
nesenel ileksen bilong US.
Joe Biden i bin winim sia bilong presiden long nesenel ileksen long Novemba 2020 tasol
Trump i wok long tokim ol pipel olsem em i win na i wok long salensim dispela win bilong
Biden. Biden bai kamap presien bilong US long Janueri 220, 2021.
Dr Kabutaulaka i tok olsem ol institusen bilong gavman long ol Pasifik ailan kantri i no
strong tumas na em i isi long bungim wankain hevi olsem.