INDIA i givim tok orait nau long kantri i ken yusim tupela sut marasin o veksin bilong COVID-9. Wanpela marasin em AstraZeneca na Oxford University bilong Briten i bin kampim na narapela em wanpela lokal kampani bilong India yet, Bharat Biotech i bin kamapim.

• Gavman bilong India i givim tok orait long yusim dispela tupela marasin.
• Gavman bilong Australiai putim oda bilong 50 milien dose bilong Oxford-AstraZeneca veksin.
• India bai givim namba wan raun bilong marasin long samting olsem 300 milien pipel long banisim ol egensim coronavirus.

Strong bilong Oxford-AstraZeneca veksin i stap long mak bilong 70.42 pesen na dispela veksin bilong Bharat Biotech ol i kolim COVAXIN em i seif na i kamapim stronpela banis egensim COVID-19was", Drugs Controller General bilong India, Venugopal G Somani, i tok.

Serum Institute of India bai wokim dispela veksin bilong, Oxford –AstraZenica na Bharat Biotech bai wok wantaim Indian Council of Medical Research long wokim COVAXIN..

India i gat moa manmeri husat i kisim COVID-19 long Asia rijon. (AP: Altaf Qadri)

Infomesen na Brodkasting Minista Prakash Javadekar i tokim ol ripota olsem i gat tupela moa veksin i we i stap long kisim tok orait bilong gavman. Ol dispela veksin em ZyCoV-D bilong Zydus Cadila na  Sputnk V bilong Rasia. Ol i wok long testim dispela tupela veksin long India nau.

"India em i wanpela kantri tasol long wol we i gat foapela veksin i wok long redi nau,” em i tok.

Populesen bilong India, em i klostu 1.4 bilien pipel. Em  namba tu kantri long wol COVID-19 i bagarapim bihain long USA. Moa long 10.3 milien pipel i kisim COVID-9 na sik i kilim pinis 149,435 pipel.  (ABC)