MANGRO em i wanpela ples bilong planti ol abus bilong solwara. Ol pis, kuka na kina na ol pisin tu i save stap long mangro. Ol pipel pipel PNG i save yusim mangro long painim kaikai na ol i yusim ol strongpela mangro diwai long sanapim haus bilong ol.  

Tasol i gat hevi i wok long kamap nau long lukautim ol mangro long PNG na planti hap long wol tu.

Level bilong solwara i wok long kam antap na dispela i kilim dai planti mangro. Ol pipel i wok long katim ol mangro diwai long kisim paiawut na sanapim haus olsem na na dispela tu i daunim namba bilong ol mangro.

Long ples Poukama long Sentral provins, i gat wok i kamap pinis long helpim na strongim konsevesen wok bilong ol mangro.

Marie Mamei em i wanpela meri long komyuniti husat  stap insait long dispela projek na em i amamas olsem ol komyuniti i wokbung long planim moa mangro long kirapim namba bilong ol mangro diwai long eria bilong ol.