PRESIDEN bilong Solomon Islands Football Federation (SIFF), William Lai i tok dispela disisen bilong ekseketiv bilong Honiara siti long kenselim lis agrimen bilong Lawson Tama nesenel spot stedium, i pas long wok politiks.

Mista Lai i tok ol risen ol i bin givim long ol media long kenselim dispela 30 yia lis agrimen bihain long 5-pela yia em i no tru. Ol i bin tok SIFF i no save larim ol arapela spot tu i yusim dispela stedium, tasol Mista Lai i tok dispela toktok i no tru.

Em i tok Honiara Siti Kaunsil i no givim SIFF wanpela fomel notis long dispela disisen bilong en long kenselim dispela lis afrimen wantaim ol.

Mista Lai i tok olsem SIFF bai gohet wantaim 6 million US dollar re-divelopmen projek long Lawson Tama stedium. Dispela stedium bai bikpela  venu tu bilong 2023 Pacific Games.