LOKDAUN long Port Vila na ailan bilong Efate i kamap bihain long ol i painim namba wan keis bilong COVID-19 keis long kantri.

Wanpela yangpela man bilong Vanuatu i bin test positiv long COVID-19. Ripot i tok dispela yangpela man husat i bin go stap long Amerika, i bin go bek long Port Vila long 4 Novemba, bihain long em i go olsem long Sydney na Auckland.

Dispela man i gat 23 krismas, em i bin test positiv tasol em i no bin pilim sik. Ol i putim em nau long kwarentin long Port Vila Jeneral Hospital.

Dairekta bilong Pablik Helt long Vanuatu, Dr Len Tarivonda i tok dispela em i lokdaun bilong sotpela taim tasol na bai ol i opim gen bihain long ol i pinisim wok bilong kontek tresing.

Dr Tarivonda i tok dispela namba wan COVID-19 keis em i low risk na i stap long kwarentin nau tasol ol i sekap long ol arapela lain husat i bin gat kontek wantaim em.

Em i tok ol i lukluk long ol 152 pasindia husat i bin kam wantaim em long balus long Port Vila na ol i lukluk tu long 12 i go inap long 40 pipel husat i bin gat kontek wantaim em.