VANUATU nau i joinim ol arapela kantri na teritori long Pasifik olsem Komonwelt bilong Noten Marianas, Papua Niugini, Fiji, Frans Polinesia, Guam, Nu Kaledonia, Marshall Ailan, Solomon Ailan na Wallis na Futuna we i gat sik COVID -19 pinis.

Praim Minista Bob Loughman i tokaut las wik olsem wanpela man Vanuatu i test positiv long 4 Novemba long Port Vila bihain long em i bin kam bek long Yunaitet Stets.

Seketariat bilong Pasifik Komyuniti i tok namba bilong ol COVID-19 keis long 10-pela kantri nau i stap long mak bilong moa 14 tausen pipel we 128 pipe i bin dai pinis.

Olgeta dispela kantri i mekim bikpela wok nau long kontrolim dispela sik na lukim olsem em i no ken kalap i go long moa pipel.

Ministri bilong Helt long Vanuatu i tok ol i putim dispela man long kwarentin long haus sik long Port Vila. Em i no sik o soim sain bilong dispela sik.

Ripot i tok ol i save olsem dispela man i kam long US we COVID-19 i bikpela tru olsem na ol i bin putim em longwe long ol arapela pasindia insait long balus i go bek long Vanuatu.

Praim Minista i tokim ol pipel vbilong Vanuatu olsem nau COVID-19 i kamap pinis long kantri, bai gavman bilong em i wok strong long lukim olsem dispela sik i no kalap i go long ol komyuniti.

Tasol Mista Loughman i tok gavman bai i no inap long pasim ol sevis bilong en.

Aninit long Covid-19 Health Sector Preparedness and Response Plan bilong Vanuatu, ol i mas muv i go long Scenario-A, we i gat wanpela keis i stap nau long kwarentin na i no kalap i go long ol komyuniti.

Papua Niugini i gat samting olsem 600 keis bilong COVID-19 na Solomon Ailan i gat 16 keis.

Long PNG dispela sik i stap pinis long ol komyuniti tasol long Solomon Ailan em i stap long wankain mak olsem Vanuatu we sik i no kalap i go yet long komyuniti.

Praim Minista Loughman i toksave olsem gavman bai wok strong long stopim sik i kalap i go long ol komyuniti, tasol em i tokim ol pipel na bisnis long harim tok bilong ol wokmanmeri bilong helt.