OPERETA bilong Bogenvil gest house na meri husat i stap tu insait long daunstrim prosesing bilong kakao i go long soklet, Delwin Ketsian, i tok long Bogenvil, ol meri nau i bosim graun na ol i mas stap insait long ol developmen i kamap long ples.

Bipo long dispela 10-yia kraisis i bin stat long 1988, Bogenvil i bin wanpela long ol provins i winim ol arappela provins long Papua Niugini na em i bin kontribut bikpela mani long ikonomi bilong PNG.

Bogenvil i no bin kamapim mani long gol na kopa long Panguna Mine tasol, Bogenvil i bin go pas tu long groim moa kakao na kopra  long Papua Niugini.

Nupela Presiden, Ishmael Toroama i putim bikpela tingting gen long strongim gen egrikalsa, na dispela bisnis meri, Delwin Ketsian, i wanbel long dispela tingting.

Ms Ketsian i tok tu olsem gavman i mas stretim gut lo na oda. Em i tok  ol i no laik hevi bilong lo na oda i stopim ol ovasis investa long go wokim bisnis wantaim ol lokal komyuniti we ol meri tu i go pas long en aninit long matrilinial sistem bilong ol.

Em i tok long hap bilong maining, em bai gavman yet i lukluk long en long bihain.

Em i laik ol ovasis investa i go na wokbung wantaim ol komyuniti long wokim bisnis o skulim ol long sampela ol gutpela wei long daunstrim prosesing long praimari indastri.