LAS wik nesenel gavman i tokaut olsem wok bilong Ilektoral Baundris bai stat long mun Julai. Ekting Ilektoral Komisina i bin tokaut long dispela las minit disisen bilong nesenel gavman long las wik Fraide.

Em i tok bai ol i raun long 4-pela rijon bilong kantri namel long 5 Julai i go inap long 20 Julai. Wan wan rijon i gat taimtebol bilong en yet we Baundris Komisin bai bungim ol provinsal edministresen na wod kaunsil na ol pipel.

Ilektoral Komisin i bin askim gavman long K14 milien long mekim dispela wok, tasol gavman i givim K5 milien.

Dispela las minit disisen bilong skelim ol baundri bai kamapim wanem kain senis? I bin gat baset bilong mekim dispela wok tu o nogat? Gavman i slip i stap we long las 5-pela yia na 10-pela mun bipo long 2022 ileksen em i kirap nogut na tokaut long sekap long ol ilektoral baundri?

Palamen i holide yet inap long mun Ogas na bai kam bek bung gen. Bai ol MP i no gat taim long dibet long ol impoten samting bikos gavman i mas redi long 2022 nesenel baset long mun Novemba.  Laip bilong Namba 10 Palamen bilong PNG bai pinis long Mas 2022 na ileksen bilong kantri bai stat long 24 Epril, 2022.

Moabeta Ileketoral Komisina na opis bilong en i statim wok redi bilong 2022 nesenel ileksen. Stretim ol ilektoral rol nau. Yumi olgeta i lukim ples klia ol hevi i bin kamap long bai-ileksen bilong Mosbi Not Wes. Bai wankain hevi i kamap long 2022 nesenel ileksen o nogat?

Praioriti bilong Ilektoral Komisin nau em long redi long 2022 nesenel jeneral ileksen. Em i no ken westim taim na mani long raun na kisim tingting bilong makim ol ilektoral baundri. Lusim dispela wok long ol arapela savelain long mekim.

Na olsem wanem long Nesenel Statistiks Opis (NSO)? Ol i redi long kaunim ol pipel long 12 Julai o nogat?

Ekting Nesenel Stetisten i wanpela komisina bilong dispela Ilektoral  Baundris Komisin. Sapos NSO i bisi long mekim dispela wok, bai em i gat taim bilong lukautim 2021 Nesenel Populesen Sensus o nogat? Gavman i bin putim planti milien kina long kamapim dispela sensus. Na taim gavman i bin makim long stat kaunim ol pipel long PNG em long 12 i go inap 23 Julai 2021.

Dispela ol de i karamapim taim em Ilektoral Baundris Komisin bai raun long foapela rijon long glasim ol baundri na toktok wantaim ol pipel.  Bai olsem wanem nau long 2021 nesenel populesen sensus?

Mak bilong wan wan ilektoret na namba bilong ol pipel em i bikpela samting. Gavman i mas gat dispela impoten infomesen long mekim disisen bilong senisim baundri bilong ilektoret.

Palamen i bin tok orait long 2021 long mekim senis long baundri bilong Sauten Hailans na Westen Hailans na tude yumi lukim Hela na Jiwaka provins i kamap.

Tasol i bin gat plen na baset bilong mekim dispela wok long kamapim tupela nupela provins. Mipela i laik save sapos i bin gat baset long 2021 mani plen bilong glasim ol ilektoral baundri  nogat?

PNG i kisim taim long ikonomi bilong kantri bikos long ol hevi COVID-19 i kamapim. Olgeta samting i sot. Watpo bai yumi lusim bikpela mani long mekim ol wok we i no bin gat baset bilong en. Na sapos i no gat nesenel sensus long 2021, bai NSO i putim gut mani bilong dispela wok na ranim sensus bihain long 2022 ileksen o nogat?

Yumi plen gut na yusim mani gut bai yumi lukim kwaliti prodak i kamap long helpim kantri. Pasin bilong wokim ol las minit disisen bai mekim kantri i paul  nabaut long rot.