Dia Edita,

Mi no amamas long gavman i tokaut olsem bai fri edukesen i kamap gen neks yia.

Dispela em i wanpela giaman gris toktok bilong ol politisen long taim bilong ileksen. Ol i laik pulim vot bilong ol manmeri olsem na ol i tokaut long fri edukesen neks yia.

Edukesen i no fri. Ol papamama i mas baim projek fi na sampela arapela fi ol skul i sasim.

Ol skul i nidim moa spes, moa desk na sia, moa kwaliti tisa, mentenens long ol bilding na planti arapela moa. Bai gavman i givim mani long ol skul long mekim ol dispela wok o nogat?

Bai no gat tru ya. Ol skul yet i mas hatwok long painim mani na stretim ol dispela samting.

Gavman i no tingting long kwaliti edukesen bilong ol pikinini. Em i no tingting long kwaliti bilong ol tisa. Em i no tingting long kwaliti bilong wan wan skul. Em i tingting tasol long kisim vot bilong ol les papamama olsem na em i tok bai i gat fri edukesen neks yia.

Ol papamama i mas skelim gut dispela samting. Watpo guria long fri edukesen na bagarapim save bilong ol pikinini bilong PNG?

Billy Sari

Tokarara

NCD