Dia edita, Watpo na gavman i laik PNG i mas putim “Kristen Kantri” insait long mamalo bilong kantri? Mi ting dispela hap tok i stap pinis long mamalo bilong yumi.  

Watpo na ol lain bilong NRI i sutim bel bilong gavman long westim taim na mani bilong raun long kantri na kisim tingting bilong ol pipel?

Moabeta Mista Isifu na komiti bilong em i lukluk long ol lo bilong stopim jenda beis vilens na soseri vailens na pasin bilong maritim moa long wanpela meri. Ol dispela pasin nogut i wok long kamapim moa hevi long PNG tude.

Yumi no ken kamap ol hipokrit. No ken kolim nating “Kristen Kantri” na bihainim yet ol pasin bilong seten! Nogat. Yumi olgeta i mas bihainim pasin bilong ol trupela Kristen na rausim ol pasin nogut i wok long daunim ol manmeri na givim nem nogut long kantri bilong yumi.

Palamen bai bung gen long mun Ogas na i no gat taim long paitim toktok long dispela ripot bilong Mista Isifu na komiti bilong em. Neks yia em i taim bilong narapela nesenel ileksen na ol memba bai tingting long ileksen na i no bisi long ol arapela samting.

Olsem na gavman i westim taim na mani bilong kamapim dispela komiti bilong raitim hap tok ya, “Kristen Kantri” i go insait long mamalo bilong PNG. Painim wok tru ya!  

Nuo Heriko

Gordons

NCD