COVID-19 lokdaun i putim Sauten Supa Lig na Nesenal Geming Kontrol Bod (NGCB) kap na Mosbi Saut RFL kompetisen long malolo inap long wanpela mun olgeta, SSL siaman na wokman bilong Mosbi Saut Rugby Football League Bagelo Solien i tok.

Solien i tok nogat wanpela samting inap long ol i bai mekim long senisim tingting bilong nesenel pandemik kontrola David Manning long ol tambu ol i putim long olgeta pilai na gem insait long kantri. Em i tok em i sori long ol i putim stop long kompetisen tasol em i bilong gutpela na seifti bilong ol pilaia, wokmanmeri na sapota. Em i salim tok long ol tim i mas bihainim na skelim gut ol lo bilong COVID-19 na redi long  gem i bai stat ken long pinis bilong tupela wik. “Yumi olgeta i mas wanbel na i gat strongpela tingting olsem olgeta wok bilong stretim kompetisen long dispela taim bilong coronavirus i bai go orait long kompetisen lo stat. Mipela i salim toksave i go long ol pilaia na kosa bilong wan wan tim long no ken belhevi na wanbel na stap long wanem dispela lokdaun em gavman i makim na bai i go inap long namba 10 de bilong Oktoba. Ol bikpela tim olsem Vipers Academy, CPG Central Dabaris divelopmen na Isou divelopmen i putim mak pinis na i wok long go pas lo sait bilong pilai insait long Kompetisen na soim rot long ol arapela tim olsem Southern Blacks, GRP West Flames na Eda Bulldogs . Solien i tok ol top 8 gem bilong Mosbi Saut RFL tu em gavman I bin stopim.

Paul Oeka i raitim