DIGICEL Kap 2021 meja semi-fainel na Maina semi fainel i bin kamap namel long foapela strongpela top tim long las wik Sande long Nesenel Futbal Stedium.

Namba wan gem namel long PRK Mendi Muruks vs Lae Snax Tigers we i bin lukim moa long tausen sapota pulapim foapela hap bilong stedium bihain long JPG Waghi Tumbe na Kroton Hela Wigmen i bin pilai du o dai gem go inap tudak. Namel long namba wan hap bilong fowat bilong Muruks i bin sin bin bihain long kisim strongpela takol

long Tigers. Dispela i mekim olgeta sapota singaut antap long em tasol gem i ran orait no gat hevi kamap namel long fil. Insait long 54 minit bilong namba tu hap na Tigers asua long takol pastaim long referi winim wisil na givim bal long Muruks, tasol Muruks i misim dispela sans bilong skoa bikos Tigers muv hariap long difens bilong ol. Snax Tigers i bin nilim Muruks 8-0 long namba wan hap bilong pilai tasol long namba tu hap Muruks i no save suruk bihain long Casey Dickson bilong Tigers skoim narapela gen wantaim gutpela kik bringim

skoa 14-0, Muruks fulbek Dickson Pipi i bin brukim tupela banis bilong Tigers na pusim trai tasol kik i abrus na skoa sanap 14-4. Leon Udupia i bin helpim Pipi wantaim narapela gutpela trai na kik wantaim apim skoa bilong namba tu hap 14-10 insait long las 4 minit klostu long ful taim. Muruks mekim long las minits bilong meja fainel tasol Tigers putim presa long ol no ken skoa inap taim pinis. Sapota bilong Tigers na Muruks wankain tasol sampela sanap ausait long geit no gat tiket na pulim taitim wantaim sekyuriti long geit.

Jacklyn Kimala i raitim