YUNIVESITI ov Papua Niugini (UPNG) i bin go pas long holim Vais Sansela Kap (VC) long Pot Mosbi. Dispela tonamen resis i bin bungim olgeta yunivesiti long kantri tasol foapela yunivesiti man tim i bin go insait long eliminesen fainel long Mande 23 Ogas, 2021.

Ol dispela yunivesiti em Lae University ov Technology Spartans (UOT), UPNG Pythons, UOG Nogondis na UPNG Blacks. Ol UPNG i bin holim olgeta fainel long dispela wik Mande tasol no gat inap taim na ol i no tokaut wina bilong VC Kap yet. Namba wan eliminesen fainel i bin kamap namel long difending sempian UOT Spartans na UPNG Pythons we i bin lukim tupela resis bihain long Spartans autim Pythons 6-4. Na wina bilong tupela malolo long gren fainel taim lusa wetim wina bilong UOG Nogondis na UPNG Blacks. Bihain long tupela resis em UOG Nogondis bungim UPNG Blacks we Blacks rausim tiket bilong Nogondis. Long wankain taim tupela UPNG tim yet i bin resis namel long ol yet na UPNG Pythons autim wan skul tim bilong em wantaim 4-0 long salensim gen UOT Spartans. Olgeta fainel mets i bin ran orait tasol no gat inap taim long gren fainel namel long UOT Spartans na UPNG Pythons bikos ples em tudak pinis olsem na ol i no tokaut long wina bilong VC yet. Vais Sansela Profesa Griffin, UPNG 2021 SRC, PNGRFL, Digicel na Coca-cola Amatil i bin go pas long sapotim dispela 2021 Vais Sansela Kap resis.

Jacklyn Kimala i raitim