BINTAGOR Goroka Lahanis tim i olsem biknem tim na em i save karim nem bilong ol pipel bilong Goroka
na Isten Hailans na go pilai Digicel Kap long ol arapela provins senta .

Olsem na taim tim i mekim olsem,
ol pipel tu i mas amamas long sapot na bekim dispela gutpela pasin tim i save mekim long karim nem
bilong distrik na provins i go raun long taim bilong pilai. Dispela pasin i bin kamap long taim lokal MP na
memba bilong Goroka Aiye Tambua, ol memba bilong Goroka Distrik Divelomen Atoriti (GDDA) na ol
pipel bilong Goroka i donetim wanpela 25 sita kosta bas i go long helpim tim na ol opisal long ol bai i ken
yusim long raun i go i kam
long taim bilong pilai. Long wanpela liklik presentesen seremoni we i bin kamap long NSI long Goroka
long Fonde long wik i go pinis, Tambua i tok, GDDA na pipel bilong Goroka i luksave na i givim dispela bas
long helpim na muvim ol pilaia i go i kam long ol ples bilong pilai. “Em i no bikpela helpim, tasol dispela
bas bai i ken helpim long muvim ol pilaia na opisal i go long ol ples bilong pilai”, Tambua i tok. Em i tok
amamas long GDDA na ol pipel bilong Goroka husat i bin wanbel na kamap wantaim dispela sapot.
Frensais ona (papa) bilong Lahanis tim Simon Sia husat em i meja sponsa i tok em yet wantaim kampani
bilong em i save i go pas long sposa long tim inap 16 yia, na i nogat wanpela sapot em i save i kam long
helpim em long sapotim tim, i kam inap nau Tambua, GDDA na ol pipel bilong Goroka i kamap wantaim
dispela helpim bilong bas. “Mipela bai yusim gut dispela bas long karimaut wok bilong em long muvim ol
pilaia na opisal long taim bilong pilai na i no long ol arapela wok. Na long makim ol pilaia na opisal, mi
bai tok amamas long Tambua, GDDA na ol pipel bilong Goroka long dispel sapot ol i givim long tim bilong
ol, Bintangor Goroka Lahanis. Lahanis i no statim gut Digicel Kap 2021 sisen gut, tasol wantaim dispela
sapot, ol pilaia bai i ken kisim sampela gutpela spirit bilong pilai gut na winim sampela gem bipo long
sisen i pinis”, Sia i tok.

Sape Meta i raitim