LEEDS Rhinos i kisim Blake Austin na Aidan Sezer long kamapim nupela patna hapbek long Supa Lig taitel resis bilong ragbi long Inglan long dispela sisen.

Blake Austin i bin pilai wantaim Warrington Wolves na Aidan Sezer i bin pilai wantaim Huddersfield Giants long sisen i go pinis. Tupela pilaia i no nupela long ol yet. Tupela i bin pilai wantaim long Canberra Raiders long 2016 i kam inap  2018 NRL sisen long Australia. Bihain ol i joinim Supa Lig long Inglan na pilai wantaim ol klap ol i pilai long en inap Rhinos i kisim ol long dispela sisen. Het Kosa bilong Leeds, Richard Agar i tok tupela pilaia i bin pilai wantaim bipo na dispela i mekim samting i isi long kamapim gutpela wokbung namel long tim na luksave long stail pilai bilong tim. “Ol i kam long bipo klap ol i pilai long en wantaim stail pilai bilong olpela klap bilog ol tasol ol i save gut long stail pilai bilong ol bipo yet. Dispela bai mekim isi long tupela i patna gut insait long fil,” het kosa Richard i tok. Austin na Sezer i pilai wantaim Raiders long 2016 na i kisim tim i kam long NRL prelimineri fainel tasol ol i lus tu poin tasol long Melbourne Storms.