NAIN minit gol bilong straika bilong Turkey na supa fowat bilong Getafe CF, Enes Unal i kirapim umben bilong biknem klap Real Madrid na ol i kisim namba wan lus bilong ol.

Madrid i winim 15 gem olgeta na dispela em i namba wan lus bilong ol long soka resis bilong La Liga. Wantaim 46 poin long 20 gem bilong dispela sisen, Real Madrid i stap namba wan yet long poin lata. Sevilla i stap namba tu wantaim 38 poin. Getafe i winim las sikis gem bilong ol aninit long bipo Menesa bilong Watford, Quique Sanchez Flores na ol i stap sikstin long poin lata. Unal i putim bikpela presa long difenda bilong Madrid, Eder Militao insait long boks na dispela i mekim Militao i lusim kontrol long bal. Unal i no westim dispela lus bal. Em i putim wanpela pawa straik i go long lep gol mak na umben i seksek. Getafe i strongim dispela gol long nain minit i go inap ful taim na ol i winim Madrid. Long narapela gem, Barcelona i suruk i go antap tu poin na i stap namba faiv long poin lata  bihainim win long Mallorca.  Luk De Jong i putim wanpela naispela heda i go insait long gol mak liklik taim bihain long hap taim. Barcelona i stap tu poin aninit long Atletico Madrid bihainim win bilong ol long hom graun wantaim Rayo Vallencano. Atletico i kisim namba wan win bihain long ol i lusim foapela gem olgeta.