Tupela gret 12 sumatin bilong De La Salle i bin winim skolasip bilong ITI na ol i tokaut long nem bilong tupela long ggreduesen de bilong ol dispela wik long Mosbi.

WINIM SKOLASIP: Tupela gret 12 sumating i kisim skolasip: Solomon Kum, Marney Kaupa wantaim Nancy Nepe i sanap wantaim bihain long greduesen seremoni pinis long De La Salle Sekendri Skul. POTO: Carolyne Ketsimur/ Wantok.

Carolyne Ketsimur i raitim

NAMEL long olgeta sumatin husat i bin greduet long De La Salle Sekendri Skul, tupela i bin kisim skolasip long International Training Institute (ITI).

Dispela tupela sumatin em Solomon Kum na Marney Kaupa. Tupela bilong Simbu provins tasol ol i stap wantaim famili bilong ol long Mosbi.

 Solomon na Marney i bin amamas tru taim ol i harim nem bilong ol long kisim skolasip long ITI.

“Mi no bin save olsem bai mi kisim dispela skolasip. Mi bin kirap nogut taim ol i kolim nem bilong mi. Mi bin wok hat tru long 4-pela yia mi skul long De La Salle. Mi ting olsem, mi kisim skolasip long dispela hatwok bilong mi,” Marney i tok.

 Bubu meri bilong Marney, Nancy Nepe, husat i bin lukautim Marney taim em i liklik yet i kam inap nau, i bin amamas tru taim Marney kisim skolasip.

 Papa bilong Marney em namba wan pikinini man bilong Nancy.  Tasol em i bin dai na meri bilong em i lusim Marney wantaim Nancy.

 Nancy i save maket raun long Gordons long painim mani bilong baim skul fi bilong Marney. Em i tok maski polis i paitim em taim em i maket, em i no save stop.

 “Mi amamas tru long olgeta pikinini i greduet tude. Moa yet em bubu bilong mi. Papa God i blesim em wantaim dispela skolasip. Em bai go skul, kisim wok na kam lukautim mi long taim bihain,” Nancy i tok.

 Narapela sumatin em Solomon, em i tok em i namba wan taim bilong em long kisim kain skolasip olsem long taim em i skul. Wantaim dispela, em i amamas tru.

 “Mi bai lukluk pastaim long ol teseri skul mi bin makim long aplikesen bilong me. Sapos i no kamap long laik bilong mi, bai mi lukluk long dispela skolasip,” Solomon i tok.

 Em i bin namba 16 gret 12 greduesen bilong De La Salle. Em i skul bilong ol pikinini man na i  kamapim planti save man bilong kantri.

 Moa long 200 gret 12 sumatin i bin greduet long dispela taim na nau ol i redi long sidaun long eksam bilong ol long wik i kam.

 Greduesen i kamap pas na bihain ol bai eksam.