De La Salle sekenderi skul long Bomana ausait long Mosbi em skul bilong ol man tasol, na tu ol prinsipal i bin ol man tasol inap wanpela meri kamap na kisim dispela wok.

HET BILONG SKUL: Prinsipal bilong De La Salle, Annette Igirin i sanap wantaim 4-pela gret 12 sumatin husat i greduet las wik. POTO: Carolyne Ketsimur/ Wantok.

Carolyne Ketsimur i raitim

ANNETTE Ingirin, em nupela prinsipal meri bilong De La Salle.

Stat long taim De La Salle skul i bin kamap, olgeta prinsipal em ol man tasol.

Long yia 2022, skul i lukim  namba wan meri i kisim dispela posisen bilong prinsipal.

Long taim em i mekim toktok bilong em long ol gret 12 sumatin, Ingirin i tok em i amamas tru long kisim dispela luksave long kamap prinsipal bilong De La Salle.

Mis Igirin i bin wisim gut ol gret 12 sumatin long eksam bilong ol we bai kamap long wik i kam. Em i tok olgeta i bin wok hat tru long 12-pela yia ol i skul na nau ol bai lusim sekendri skul na go moa long teseri skul.

“Kwaliti edukesen em laip,” em i tokim ol sumatin.

“Kwaliti edukesen em taim u lainim moa samting autsait long klasrum. Em ol veliu, komitmen, gutpela pasin, pasin bilong lotu, dedikesen na strong bilong mekim gut wok long lukim gutpela taim bihain.” Igirin i tok.

Em i tokim ol sumatin long karim gutpela pasin ol i lainim taim ol i lusim De La Salle na go mekim senisim laip o ples wantaim ol dispela pasin.