PRAIM Minista bilong PNG, James Marape i tok olgeta risos projek bilong kantri i mas go long olgeta provins long kantri. Em i bin mekim dispela toktok bihain long Gavana bilong Westen i askim gavman long salim 67 pesen win mani bilong Ok Tedi main i go long Westen.

Em i tok, “Westen Provins i hostim Ok Tedi Main na i sapotim PNG long 38 krismas nau, tasol i nogat bikpela projek we provins i kisim.” Long bekim dispela toktok, Praim Minista Marape i tok, olgeta provins tu i gat nid. Em i tok, “Yumi stap long wanpela kantri na yumi mas serim ol risos long wankain skel.” Em i tok wantaim 67 pesen we i save go bek long nenesel baset, gavman bai putim yet ol bikpela projek long Westen Provins. Praim Minista i tok gavman bilong Australia na PNG i wokbung wantaim long mentenim haus sik long Daru na mekim kamap olsem pemenen bikpela haus sik. “Wantaim mani i kam long 67 pesen, Minista bilong Plening i wok hat long kisim 2 pesen long takis kredit skim na dispela mani bai go long putim kolta long rot long Kiunga i go long Tabubil,” PM Marape i tok.