Paul Wagum i raitim LONG Fraide 8 Oktoba, ol bisnis manmeri bilong Buka taun i bin holim wanpela protes mas long soim olsem ol no amamas long planti blakaut i wok long kamap long PNG Pawa long Buka Taun.

Ol i bin tok olsem PNG Pawa i wok long gat ol blakaut klostu klostu na i save mekim ol bisnis i no inap long mekim gut ol wok bilong ol na ol no inap long givim ol gutpela sevis long ol kastoma bilong ol. Na tu ol i lusim planti mani. Ol i tok moa olsem blakaut i kamapim planti bagarap long ol kago bilong bokis ais na bikos ol i bagarap ol i no inap salim long ol kastoma.  Dispela tu i mekim na ol i lusim planti tausen kina long ol bisnis bilong ol. Sampela i tok olsem ol masin bilong ol olsem ol kompyuta tu i bagarap bikos long planti pawa blakaut. Sampela haus long Buka tu i bin paia na planti i bilip olsem pawa i kamapim ol dispela hevi tasol dispela i no klia tumas bikos i nogat inap wokpainim long ol dispela na PNG Paia Sevis tu i no save tok klia long ol wokpainim em bin karimaut long ol sampela paia we i bin kamap long ol komesel propeti long Buka sampela yia i go pinis. Makim kampani husat i save salim fiul long PNG Pawa, Nick Peniai i bin tokaut olsem PNG Pawa i gat dinau long kampani bilong em inap long K6 milien. Em tok moa olsem, bikos long dispela bikpela dinau, kampani bilong em GMT Automations, i bin stop long givim fiul long PNG Pawa. Mista Peniai i tok tu olsem, kampani bilong em i bin toktok wantaim ABG long kisim fiul i kam long Singapore bikos prais bilong em bai  daunbilo liklik. Bisnis man na bipo Rijinol Memba bilong Bogenvil, na nau Menesa bilong Buka Taun Fidelis Semoso i bin singaut long PNG Pawa long apim ol sas (tarriff) bilong ol. “Dispela wei tasol bai PNG Pawa i gat inap mani long baim fiul na mekim ol narapela wok long provaidim pawa long kastoma bilong em long Buka taun,” Mista Semoso i tok. Mista Semoso tu i askim ABG Minista bilong Teknikol Sevis, Dr. Joe Kim Suamaru long toktok wantaim ICCC long tok orait long  PNG Pawa long Buka long apim ol sas bilong ol na long wankain taim em mas toktok wantaim ABG long baim dinau bilong PNG Pawa long GMT Automations.