EUROPE - PNG Bisnis Kaunsil, PNG Investment Promotion Authority, PNG Nesenel Tred Opis na Dipatmen bilong Komes na Indastri i wok bung wantaim tim bilong European Union long Papua Niugini

long holim namba tu EU-PNG bisnis, Tred na Invesmen konprens long Pot Mosbi stat long Oktoba 11 i go long 12, 2021.

Astingting bilong dispela konprens em long helpim kantri long mekim moa bisnis kontek, luksave long ol sans bilong mekim bisnis na wok wantaim ol arapela patna olsem Fiji, Samoa, Solomon Ailan, Tonga na Timor- Leste.

Namba wan de bilong konprens em de bilong luksave long ol bisnis patna na toktok long ol sans bilong mekim bisnis, tred na invesmen bilong kamapim sastenabol divelopmen.

Namba tu de bilong konprens em de bilong painim gutpela rot bilong kisim sastenabol divelopmen long dispela taim we PNG na Pasifik rijon i bungim hevi na ol salens.

Embeseda bilong EU long PNG, Jernej Videtic i tok dispela konprens bai strongim wok bung namel long EU, PNG na Pasifik Rijon.

Em i tok bai helpim ol long luksave long ol bisnis opotuniti na tu apim moa invesmen long PNG.

Long dispela taim bilong COVID-19 we kantri i bungim bikpela hevi long ikonomi, dispela em gutpela sans long kantri i luksave na kisim moa bisnis i kam insait long kantri.

Embeseda Videtic i tok wanpela impoten bisnis sekta em indastrial egrikalsa.

Bai gat planti infomesin i kamap long dispela konprens bilong strongim tingting bilong bisnis manmeri na ol bisnis investa.

Bai i gat ol fomal presentesen we bai givim ol impoten infomesin bilong kirapim diskasen long taim bilong konprens.