DISPELA COVID-19 veksin o banis sut bilong Saina, Sinopharm i kamap long Pasifik na
Solomon Ailan i stat long givim long ol pipel. Namba tu Praim Minista bilong kantri,
Manasseh Maelanga i bin kisim namba wan sut.

Saina i givimaut planti tausen Sinopharm marasin long Solomon Ailan na PNG.
 Australia i promis long givim AstraZeneca veksin em ol i wokim long Australia, i go long ol
kantri long Pasifik.
 Ol lida bilong ol Pasifik kantri i tok dispela toktok bilong ol bikpela kantri i resis long winim
sapot long taim ol i givimaut veksin, e mi no tru.
Saina i bin givim 50,000 dos bilong Sinopharm long Honiara bipo long ol i bin kisim tok
orait, tasol nau ol i opim rot bilong ol arapela kantri long Pasifik tu long kisim dispela veksin.
"Solomon Ailan i namba wan kantri long yusim Sinopharm veksin long nesenel rolaut plen
bilong en," Li Ming, embesada bilong Saina long Solomon Ailan.
"Dispela i soim olsem Saina na Solomon Ailan i pren tru na ol i ken trastim wanpela
narapela.”

Solomon Ailan bai givimaut Sinopharm wantaim AstraZeneca long ol franlain woka na ol
"spesel grup", wantaim ol studen husat i plen long go long Saina.
"Sapos mipela i no gat namba tu sut bilong Sinopharm veksin, bai mipela i kisim taim bikos
sampela pipel long kantri bai i no inap long kisim banisi sut," Helt Minista Culwick
Togamana i tok.
Dispela i kamap long wankain wik we Australia i tok long givim 60,000 moa dos bilong
AstraZeneca veksin em ol i wokim long Australia, i go long ol Pasifik kantri. Dispela i
mekim tu planti manmeri i tok Saina na Australia i wok long resis nau long winim sapot
bilong ol kantri long Pasifik.
Saina i givim 200,000 dos Sinopharm long Papua Niugini. Na Minista bilong Helt, Jelta
Wong i tok i gutpela olsem i gat narapela veksin ol i ken givim long ol pipel.
Wol Helt Ogenaisesen (WHO) i bin givim tok orait long ol kantri i ken yusim Sinopharm
long las mun. Na strong bilong dispela marasin em i 79 pesen.