Lusim olgeta hevi na wari bilong yumi go long God, i go long Holi Spirit. Man o meri gat bilip long helpim bilong Holi Spirit i amamas olgeta taim long laip bilong ol.

Long Sande 14 Me 2023, mipela i selebretim Mother’s Day long Papua Niugini. Long St. Mary’s Katolik paris insait long Goroka Taun, mipela i selebretim tu De bilong Ol Nes, Dokta na olgeta wokmanmeri bilong Haus sik.

Long onaim de bilong ol, mipela i givim ol long go pas long lotu namba tu misa bilong dispela Sande. Mi yet i go pas long lidim santu Misa.

Long statim homili, mi bin stori long wanpela ekspiriens bilong mi wantaim wanpela pren bilong mi. Pren bilong mi bin stori long wanpela stori em i harim long bubu meri bilong em taim em i gat 9-pela krismas bilong em.

Stori bilong bubu bilong em i go olsem. Long wanpela de, bubu meri bilong em i laik go long narapela siti. Taim em i kalap i go insait long bas, em i lukim wanpela mama i sanap na putim wanpela bikpela bek antap long lek bilong em. Bek i hevi tru.

Draiva i sori long em na i askim mama long givim dispela bikpela kago bilong em long draiva na bai ol boskru i ken putim insait long ples bilong kago insait long PMV bas.

Tasol mama i strong tumas long tok nogat. Draiva i traim hat long konfisim em, olsem kago bilong em bai stap seif long ples bilong kago insait long bas. Taim yumi kamap long narapela taun, bai yu ken kisim bek.

Tasol mama i tok nogat. Mi sori long bas, bilong wanem bas i karim planti manmeri pinis na i gat planti kago i stap insait long bas pinis. Mi no laik givim hevi long bas gen long karim kago bilong mi. Larim mi yet i karim hevi bilong kago bilong mi antap long lap bilong mi.

Mi pilim fani long dispela bekim bilong mama. Em i sori long bas i karim planti kago pinis. Na em i laik helpim bas long karim kago bilong em yet. Tasol Mama i no save olsem em i sindaun insait long bas, na bas i karim em wantaim kago bilong em pinis.

Stori bilong Gutnius mipela i ridim long Sande 14 Me, 2023 i kam long John:14:15-21 – Jisas i givim sampela las tok bilong em long Gut Fonde nait. Em i tokim ol disaipel bilong em olsem em bai lusim ol, tasol em bai no larim ol disaipel bilong em i stap ol yet. Em i promis bai em i askim Papa long salim HELPIM bilong em i kam long sambai long ol. Na Jisas bai stap wantaim ol disaipel, na ol manmeri bilip long em inap long graun i pinis. Holi Spirit i kam pinis na i stap namel long ol manmeri pinis. Helpim bilong God i stap pinis. Tasol sampela taim, yumi manmeri bilong graun i no inap yusim gut helpim bilong em.

Olsem mama insait long stori antap, em i laik karim hevi bilong em yet. Bas i redi long karim hevi bilong em, tasol mama i no laik larim helpim i kam long em.

I no gat wanpela man o meri fri long hevi, wari, pen na taim nogut. Holi Spirit i stap insait long yumi na em i redi long helpim yumi. Tasol yumi no laik larim hevi na wari bilong yumi go long ples kago bilong bas. Yumi laik putim wari na hevi insait long laip bilong yumi yet, olsem na yumi karim hevi na i no amamas oltaim.

Spirit bilong God i redi long karim hevi bilong yumi. Lusim olgeta hevi na wari bilong yumi go long God, i go long Holi Spirit. Man o meri gat bilip long helpim bilong Holi Spirit i amamas olgeta taim long laip bilong ol.

Na yu yet olsem wanem?

PINIS.