No ken lustingting long God taim yu kisim olgeta samting yu laikim.

Wantaim Fr. Paul Liwun

Tude mi laik stori long pasin bilong ol manmeri i save lusim tingting long God.

Long wanpela taim bilong Krismas, wanpela mama husat i no marit, i baim wanpela naispela toi na givim long pikinini bilong em olsem presen bilong Krismas.

Mama i baim namba wan toi stret, bilong wanem pikinini boi bilong em i save soim gutpela na stretpela pasin tru. Olgeta de taim mama i kam bek long wok, em i save ran i go bungim mama na holim pasim em. Em i soim amamas bilong em long mama i kam bek pinis.

Taim mama i givim Krismas presen long em, em i opim stret na i amamas tru na tok tenkyu long mama bilong em.

Narapela de, em i stat long pilai wantaim toi bilong em. Em i bisi tru long pilai wantaim toi bilong em na taim mama i kam bek long wok, em i no go moa long welkamim na holim pasim mama bilong em. No gat tru. Em i bisi tru long pilai wantaim nupela toi bilong em. Mama i lukluk tasol long em. Mama i no mekim wanpela tok.

Em i go boilim wara na dring ti bilong em. Pikinini i no kea long mama bilong em. Em i bisi tasol long pilai wantaim toi bilong em.

Bihain long dring ti, mama i askim boi bilong em long kisim rabis na putim long rabis bin. Em i wanpela gutpela wok, pikinini bilong em i save wokim.

Tasol mama i kirap nogut tru, bilong wanem pikinini i no harim mama bilong em. Mama i askim namba tu, na namba tri taim. Nau pikinini i bekim mama bilong em, yu yet kisim rabis na tromoi long rabis bin. Yu save o no gat? Mi bisi long pilai wantaim nupela toi bilong mi. No ken givim mi narapela wok long mi.

Mama i kirap nogut tru. Na em i rigret, sapos dispela toi i bin bagarapim pasin bilong boi bilong mi, bilong wanem mi baim na givim presen long em?

Pikinini boi i lusim tingting long husat i bin givim toi long em. Toi, em i wanpela gutpela presen long helpim em soim rispek bilong em moa moa yet long husat i bin baim dispela presen. Bilong wanem em i amamas tumas long presen na i lusim tingting long mama bilong em.

Planti manmeri long dispela taim i soim wankain pasin olsem dispela pikinini. God i bin givim LAIP olsem namba wan presen long yumi. God i bin givim planti gutpela samting long yumi, tasol sampela bilong yumi i lusim tingting long husat i bin givim gutpela samting long yumi. Planti i no moa go lotu long Sande o wokim prea. Ol i laik go pilai o wokim mani long Sande. Ol i wari tumas long wok na mani samting, na lusim tingting long planti samting God i bin givim ol. i no gat rispek moa long God.

Yia 2022 i klostu pinis nau! Skelim na glasim pasin bilong yumi gut na redim yumi yet long go insait long nupela yia 2023. Divelopim gutpela pasin bilong tingim na soim rispek o tok tenkyu long husat i givim planti gutpela samting long laip bilong yumi.

PINIS.