Dia Edita,

Nesenel Sensus o kauntim pipel long dispela yia bai i no inap givim gutpela risal.

Mi wok 22 yia wantaim National Census Opis (NSO), na mi wari olsem dispela pasin bilong kisim data yusim Straksarel Listing long dispela taim bai i no inap givim trupela piksa long hamas pipel stret i stap long PNG.

Taim em i sot tru pinis na PNG em i wanpela hatpela kantri long mekim kain wok olsem long wanem ol pipel i stap long ol maunten, arere long ol bikpela wara, long ol ailan na longwe long ol taun.

Straksarel Listing em i wanpela bilong ol wok we i mas kamap pastaim long bikpela sensus. Kwaliti bilong dispela wok bai i givim gutpela mak long mekim gutpela wok bilong kauntim ol pipel.

Insait long straksarel listing NSO bai i painim, makim na kauntim olgeta pipel insait long olgeta haus insait long wanpela ples.

Astingting bilong straksarel listing em long redim ol wok we bai i mas kamap long taim bilong bikpela sensus. NSO i ken skelim hamas wok wan wan opisa bai i mekim long fil, hamas mani ol bai i nidim na moa yet dispela straksarel listing em bai i stap olsem wanpela lista bilong sekim ol wok bilong sensus.

Dispela sensus nau bai i yusim satelait long kisim piksa bilong ol straksa i stap long ol rurel ples. Satelait bai i kisim piksa bilong olgeta straksa olsem haus bilong ol pipel, etpos, klasrum, haus kakaruk o fektori.

Dispela pasin bilong kisim infomesen em i no stret na i no bihainim stret pasin na standet bilong kisim data.

Na tu frem bilong dispela straksarel listing i bihainim frem bilong 2000 Nesenel Populesen Sensus. Long las sensus long 2011 i no bin i gat wanpela gutpela straksarel listing olsemna long dispela straksarel listing NSO bai i yusim wanpela frem bilong 20 yia i go pinis.

Dispela nesenel sensus bai i kamap long wankain taim olsem nesenel jenerel ileksen wankain olsem las sensus long 2011 we i kamap klostu tasol long 2012 nesenel jenerel ileksen. Nesenel senses bai i ran long taim ol lain long PNG Ilektorel Komisin bai i apdetim komon rol bilong nesenel ileksen long kantri.

Planti pipel bai i paul long dispela tupela wok i kamap na ol pipel i ken ting populesen sensus em komon rol apdeit na ol bai i apim nating ol namba bilong ol pipel.

Mi singaut tu long gavman long kirapim wok bilong oditim ol mani i go aut long wok bilong sensus. Em i tok gavman i givim mani long 2018 long redi long dispela sensus. Namel long 2018 na inap nau NSO i bin gat faivpela ekting Sif Ekseketiv Opisa na tupela Sensus Dairekta.

Peter Maime,

Sinia Stetisen

NSO