WANPELA meri long Nesenel Helt Dipatmen i lukim sans bilong mekim mani na em i putim sampela COVID-19 mani i go long ketering kampani  we em i seaholda long en.

Hamas kaikai kampani bilong em i kukim na saplaim long Rita Flynn aisolesen fesiliti bilong COVID-19 em i no klia long wanem bikpela hap taim dispela fesiliti i bin pas long 2020.

Long nem bilong sik COVID-19 wanpela meri i laik mekim mani taim planti laip i kisim bagarap long dispela sik.

Yumi skelim wanem kain pasin korapsen na etik bilong wok em i soim na husat ol lain i sapotim dispela pasin. Em i no stret tru taim ol pipel i dai long dispela sik na wanpela ketering kampani I mekim mani.

Wanem taim bai ol manmeri i stap long ol posisen bilong risponsibiliti i tingtim ol pipel na gutpela bilong kantri pastaim?

Planti dispela ol mani i kam long ol divelopmen patna. Sampela dispela ol mani i no fri mani. Ol i ken taitim gavman bilong yumi PNG long sampela hatpela disisen long bihaintaim. Na taim dispela i kamap yumi ken tok tenkyu long dispela longlong meri na ol arapela husat i helpim em long helt dipatmen husat i helpim em long dispela longlong tingting?

Nau yumi harim long kantri olgeta ol Provinsel Helt Atoriti i sot long ol PPE na ol samting bilong mekim wok bilong banisim COVID-19. Nau dispela taim moa long ol arapela taim PNG i nidim mani long mekim wok bilong COVID-19 na tok bilong paul pasin long helt dipatmen i kamap.

Yumi nidim helpim bilong ol polis na sekyuriti fos long kontrolim ol muvmen na pasin bilong ol pipel long pablik. Tasol olgeta i tok nogat mani. Bilong wanem? Yumi save pinis nau wanpela o tupela gridi man o meri bai i mekim longlong pasin na paulim mani we i kam bilong helpim olgeta pipel.

Praim Minista James Marape i givim oda pinis long wok painimaut i mas kamap long dispela ol mani.

Long dispela taim tu Praim Minista Marape i singaut long ol provinsel Helt Atoriti long givim ol mani ripot bilong ol long ol mani ol i kisim pastaim. Em i mekim singaut bihain long Oposisen Lida Belden Namah i singaut gavman i mas givim mani ripot bilong COVID-19.

Nau ol ripot i kamaut olsem moa long K500,000 i go long ketering long Rita Flynn Aisolesen Fesiliti.

Dispela kain ol pasin i mekim na ol divelopmen patna bai i nogat moa bilip long PNG long lukautim yumi yet long kain taim bilong hevi. Na ol bai i salim ol teknikol wokmanmeri bilong ol yet long kam na mekim wok we mipela yet inap mekim.

Ol bai i putim strongpela mesa long menesim mani bilong ol long lukim gutpela risal. Em i orait tasol em i no luk gut long kantri olsem wanpela independen kantri husat inap lukautim gut ol pipel bilong em.

Na tu em i no luk gut tru long yumi olsem kantri taim yumi go singaut long arapela kantri long helpim yumi na taim helpim i kam, yumi aplaim korapsen long helpim yumi wan wan yet.

COVID-19 mani em i no bilong sampela lain tasol. Em i bilong lukautim ol lain i kisim sik na ol lain i go pas long paitim na daunim sik COVID-19. Tingim ol helt woka – ol nes, dokta na ol wokmanmeri long haus sik. Tingim ol polis na soldia na ol sekyuriti fos husat i stap sambai long daunim dispela sik.

Gridi pasin i no inap helpim PNG. Korapsen i bagarapim pinis PNG na yumi mas wok hat long kilim dispela pasin tu.