KRISMAS na Nu Yia i kamap klostu nau na ol pipel bilong PNG i paul nabaut long dispela K16.335 bilien baset bilong 2021.

Las wik Suprim Kot i bin tokaut olsem dispela bung bilong Palamen bilong we ol memba bilong gavman i bin tok orait long 2021 baset i no bin bihainim lo. Suprim kot i givim oda long Spika i mas singautim olgeta memba i kam bung gen long Mande 14 Desemba. Long taim ol memba i bung Spika i askim long skruim miting i go long Trinde 16 Desemba bikos em i laik askim kot long tok klia sapos memba bilong Kerowagi, Bari Palma i stap memba yet o nogat. Long wankain taim tu. Gavman i bin askim Suprim Kot long skelim sampela askim bilong ol.

Oposisen na gavman i pulim ol memba i go i kam nau long senisim gavman na kot keis bilong ol tu i stopim miting bilong palamen long ran gut. 

Oposisen i putim pas bilong ol pinis long muvim vot i no gat bilip long Marape gavman na ol i makim Memba bilong Aitape Lumi olsem kendidet bilong ol long wok bilong praim minista. Dispela pas bilong Oposisen bai i go long komiti  bilong palamen long skelim pastaim na toksave long spika. Tasol long taim kantri i wet i stap, mani bilong mekim ol wok tu bai lok i stap inap palamen i givim tok orait long 2021 baset o sapos i gat wanpela vot i no gat bilip i kamap long gavman bilong tude.

Ol gavman dipatmen na ol provinsal gavman i no inap spendim mani. Bai ol i sindaun na wet i stap. Ol kampani na ol manmeri husat i gat dinau wantaim gavman bai i mas wet tu inap baset bilong 2021 i kisim tokorait bilong palamen.

Yumi hop bai kantri i no inap long wet longpela taim. I gat planti bikpela wok i mas kamap long 2021, na i gat ol dinau em gavman i mas stretim bipo long dispela yia 2020 i pinis. Ol provins i mas stretim baset bilong ol bihain long ol i kisim skel bilong ol. Tasol nau olgeta plen na program bilong ol tu bai i hangamap nating inap ol toktok bilong 2021 i stret.

Dispela yia 2020, i bin bungim planti bikpela salens. Bikpela salens tru PNG wantaim ol arapela kantri long wol i bin bungim em COVID-19. COVID i bagarapim ikonomi bilong kantri na planti manmeri i lusim wok bikos kampani bilong ol i no inap long holim ol i stap. PNG i laki inap nau, bikos dispela sik i no kilim planti tausen manmeri olsem long ol arapela kantri long wol. Tasol ol pipel bilong yum ii pilim pen bilong mani i sot long inapim ol nids bilong ol.

Ol memba bilong palamen i mas luksave olsem long taim ol i pulim na taitim toktok i go kam, ol pipel bilong kantri bai kisim taim. Ol pipel i makim ol memba long karim wari i go long palamen na kamapim ol gutpela lo, na bringim sevis i go long ol pipel. Ol i no makim memba long go pilai politik na resis long senisim gavman klostu klostu.

Kantri i nidim ol gutpela stretpela lida long go pas long stiaim PNG long 2021 na i go moa. Ol pipel i paul long as bilong tok, namel long Gavman na Oposisen. Neks yia em i las yia bilong laip bilong dispela palamen bipo long kantri i redi gen long 2022 nesenel ileksen. Sapos yumi no stretim dispela hevi bilong gavman na 2021 nesenel baset, bai kantri i pilim pen bilong en long neks yia na ol mun i kam bihain.