TWENTI memba bilong palamen i sanap na redi long helpim long daunim hevi bilong vailens long kantri. Em i gutpela tru na em i stat.

Ol memba na olgeta husat i kamap long dispela GBV samit long dispela wik long Pot Mosbi i kamapim sampela resolusen o strongpela disisen long adresim olgeta kain vailens long kantri insait long ol yia i kam.

Papua Niugini i gat rekot nogut tru long pasin bilong paitim na bagarapim meri insait long famili. I gat sampela nius ripot tu long vailens long ol man insait long famili tasol i nogat planti toktok long dispela.

Em i soim PNG i stap long wanem mak wantaim tingting bilong em long menesim ol hevi bilong ol famili insait long kantri.

Sapos yumi kisim skul bilong ol anis bai yumi lukim olsem sapos yumi larim wanpela anis i stap em bai i kamap tenpela na dispela tenpela bai i gro na i no longtaim bai ol pos bilong haus i bruk bruk na haus i pundaun.

I gat sampela skul yumi ken kisim long dispela liklik tok piksa. Namba wan em anis em i liklik samting nating tasol em i ken kamapim birua o bagarap. Sampela taim em bai i pas long skin bilong yumi na givim liklik pen, na yumi kilim em. Em solusen bilong nau tasol. Namba tu em pasin bilong anis long wok bung na namba tri em wanem kain bagarap i ken kamap taim koloni bilong anis i gro na ol i wok. Ol i no tingim olsem wok bilong ol bai i kamapim hevi. Ol i wok tasol long inapim hangre bilong ol.

Wankain long vailens. Husat i apim han na paitim meri i no tingting long wanem bagarap bai i kamap. Sampela i tok em i stap long blut pinis long paitim o rabisim meri na sampela taim man. Dispela rabis pasin i mas stop!

Vailens i stat liklik insait long haus na i go ausait. Nau em i stap long skul, long ol gavman dipatmen, insait long ol sios na long ol strit tu. Tasol inap 40 yia nau ol lida i no lukim o i pasim ia long ol krai i wok long kamap.

PNG i gat planti lo bilong lukautim na banisim ol pipel bilong en long vailens. Dispela i min lukautim ol meri tu. Planti lo long banisim ol meri na long daunim vailens i stap pinis tasol yumi save painim rot bilong abrusim dispela hap wok. Insait long ol kot sistem na long ol polis stesin tu ol i save tok em i hevi bilong famili na salim tupela manmeri i go bek long haus long stretim. Em i gutpela tasol long haus tripela pikinini i lukluk i stap na ol bai i bikpela wantaim dispela tingting olsem pait tasol inap stopim hevi. Sapos olgeta famili husat i stap wantaim vailens i kalabus insait long dispela rot bilong stretim hevi ating PNG bai i lukim gutpela sindaun?

Planti taim wok bilong daunim vailens i save sut long stretim hevi bilong nau tasol olsem anis i kaikai yumi, na i no lukluk long wanem as tru sampela dispela hevi i save kamap.

Ating insait long las 40 yia wankain olsem korapsen PNG i larim tasol vailens i gro i go i go na nau em i traipela enimal tru bai kantri inap daunim? Em i salens bilong olgeta wan wan lida. Inap wanpela dispela 20 lida i senisim ilektoret bilong em we vailens i no stap moa na pasin bilong laikim na bel isi i stap? Inap ol i strongim olgeta lo i stap pinis na mekim ol i wok?

Dispela ol resolusen i no ken sindaun nating na luk nais long pepa. Ol i mas kamap eksen tru tru. Na wantaim 20 memba bilong palamen i gat hop PNG bai i suruk i go long wanpela gutpela mak.

Tasol dispela i no min ol pipel i mas larim olgeta wok long han bilong ol 20 memba bilong palamen tasol. Olgeta pipel i mas sanap na wok bung wantaim long daunim dispela hevi bilong jenda bes vailens.