Mi wari tru long pasin bilong spak brus na kalt i wok long kamap long Madang. Olsem wanem bai gavman inap helpim mipela long daunim dispela hevi?

Ol yangpela bilong mipela long ol skul i bungim planti salens taim wanskul i grisim ol long smuk na pulim ol i go insait long lainim pasin kalt.

Plis helpim.

Sandra Mur

Not Kos Rot, Madang

2. Dia Edita,

Wanem taim bai Goroka maket i op?

Mipela ol mama long Goroka i askim wanem taim tru bai Goroka maket i op? Longpela taim nau mipela i wetim maket long op.

Mipela i save sindaun long sait bilong rot na olgeta kona bilong Goroka taun long traim long salim sampela ol gaden kaikai na sekenhan bilong mipela. Inap wanpela lida i tok klia wanem taim bai maket i op?

Mipela i wok hat long kamapim ol samting bilong salim na mipela i mas kisim rispek bilong Isten Hailans gavman long sindaun gut na salim ol samting long maket.

Melvina Ato

Seigu, Goroka

3. Dia Edita,

Tenkyu Wantok Niuspepa

Mi laik tok bikpela tenkyu tru long Wantok Niuspepa long luksave long Nesenel Prea De. PNG em i Kristen kantri na mi amamas wanpela niuspepa i luksave long dispela.

Mi amamas tu long lukim dispela pes long Facebook bilong Wantok Niuspepa.

God blesim yu.

Jason Dau

6 Mile, Pot Mosbi

4. Dia Edita,

Hepi Indipendens Papua Niugini

Mi amamas tru long harim olsem PNG em bai i amamasim indipendens. Olgeta yia taim mi harim indipendens mi save wanbel tru long wanem mi save mi gat ples.

Mi hop dispela yia ol selebresen bai I kamap gut.

Mi laik tu olsem yumi mas sanap olsem wan kantri na apim wanpela plak tasol. Maski long ol provinsel plak. Larim ol i stap long taim bilong ol yet. Nau em taim bilong yumi olgeta. Pasin barata i mas stap.

Peter Morris,

Gerehu, Pot Mosbi

5. Stopim pasin bilong vailens

Dia edita,

Long tripela wik nau, ol pipel i singaut gen long gavman long stopim pasin bilong vailens na paitim na bagarapim ol meri. Dispela singaut i kamap bihain long wanpela yangpela mama long Pot Mosbi i dai long han bilong man bilong em.

Olgeta wik yumi wok long harim stori bilong ol meri i dai long taim bilong jenda-beis vailens, o long taim ol man i sutim tok long pasin sanguma na posin, o long taim ol birua i bekim dinau.

Ol dispela pasin bilong vailens i kamap bikpela tru na i soim ples klia olsem yumi givim baksait long Kristen bilip. I gat lo i stap, i gat ol polis i stap, i gat ol komyuniti lo na oda komiti na i gat ol viles kot i stap long stretim ol hevi. Tasol i gat ol manmeri husat i no laik yusim ol dispela stretpela rot. Ol i no laik daunim belhat bilong ol na larim lo i stretim wari bilong ol.

Dispela hevi bilong vailens i stap strong tru long PNG tude. Em i wok bilong yumi olgeta long bung wantaim na stopim dispela pasin nogut i wok long bagarapim kantri bilong yumi.

Henry Roiden

Gordons

NCD