Dear edita,

Gavman i tokaut nau long Stet ov Imejensi (SOE) las wik na nau PNG i pas inap 14 de.

Dispela lo i gutpela bikos insait long dispela 14 de ol helt woka i ken testim ol manmeri husat i soim ol mak bilong dispela sik coronavirus o COVID-19.

PNG i laki tru olsem dispela sik i no kamap long kantri yet. Dispela ovasis man husat i bin karim sik i kam long kantri em ol i salim em i go bek long Australia las wik yet.

Yumi mas harim tok bilong ol dokta na wasim han oltaim, stap long haus na no ken raun long ol ples we planti manmeri i bung. Yumi stap isi na helpim long stopim sik i kalap i go long ol arapela manmeri.

Julie Tauai

Ensisi Valley, NCD

 Pre long ol manmeri i kisim COVID-19

Dia edita,

Mi wok long lukim nius bilong ol manmeri long Yurop na USA i wok long dai long dispela sik coronavirus na mi sori tru. Mi hop na pre olsem dispela sik i no ken kamapim bikpela hevi long PNG. Yumi sori tru long ol nes na dokta na spes long haus sik. Ol dispela helt woka i nidim ol kos na ol hanglap na ol mask long protektim ol long taim ol i wok wantaim ol sikman.

Nau em i taim bilong Lent na PNG em i wanpela Kristen kantri olsem na yumi ol pipel i mas pre long God i ken marimari long ol dispela kantri we coronavirus i wok long kilim ol pipel tude.

Maria Konai

Sogeri, Sentral Provins.

Larim ol dokta tru i toksave

Dia edita,

Olgeta de ol politisen i save kamap long nius na toktok long dispela sik coronavirus na wanem samting gavman i mekim long stopim sik i kam insait long PNG. Tasol mi laik save watpo na ol dokta na saintis i no save stap tu long dispela program na toksave long ol pipel.

Polis Minista na Helt Minista i ken toktok long wanem samting dipatmen bilong ol i mekim. Tasol ol pipel bilong PNG i nidim ol saveman na meri olsem ol dokta na saintis tu i kamap na tok klia long dispela sik. Mipela i les long harim toktok bilong ol politisen bikos nau yet, i luk olsem Helt Minista na Polis Minista i no wok bung.

Barry Sapula

Konedobu, NCD

Prais bilong buai sut go antap

Dia edita,

Ol lain bilong kaikai buai long Mosbi i kisim taim nau bikos NCD na ol lain i go pas long SOE i putim strongpela tambu long buai. I tambu long ol lain i karim buai i kam insait long siti na i tambu long salim buai arere long ol haus o long strit. Ol polis i patrol raun na rausim buai long ol Mekeo na ol arapela lain.

Dispela tambu i mekim na prais bilong buai i sut i go antap tru. Prais bilong wanpela buai em K5 na ol i katim liklik na salim long K1.

Buai em i no kaikai olsem na watpo apim prais olsem. Mi laik gavman i mas sekap na sasim ol dispela gridi manmeri.

Dulcie Kanau

Gordons, NCD

Ol pipel raun nabaut long strit

Dia edita,

Yumi laki olsem coronavirus i no kamapim ol bikpela hevi long PNG yet.

Mi tok olsem bikos mi lukim ol pipel long NCD i no harim tok bilong gavman na stap long haus long dispela 14 de. Ol i wok long raun nabut na sindaun long ol kona na stori wantaim ol pren. Ol i no wari long dispela tambu long bung wantaim ol arapela manmeri; stap longwe long ol lain i gat kus; na pasin bilong wasim gut han oltaim long sop.

Long taim coronavirus i kamap bikpela long PNG, ol pipel bilong Mosbi bai kisim taim bikos ol i wok long bikhet i stap. Ol i ting dispela 14 de em i taim bilong malolo na amamas raun na stori wantaim ol poro.

Jonah Baren

5 Mail, NCD

Larim ol speselis i toktok long COVID-19

Dia Edita,

Watpo na ol politisen i laik tekova long wok bilong givim infomesen bilong COVID-19 i go long ol pipel bilong PNG.

Olgeta de mi wok long harim ol toktok bilong ol politisen long coronavirus na mi paul ya. Helt Minista i gat wei bilong em long eksplenim ol samting. Polis Minista i mekim ol toktok long save bilong em yet.

Larim ol saveman o expert bilong saiens na marasin i givim stretpela infomesen. No ken bihainim pasin bilong Donald Trump we em i save givim fake news na bihain ol dokta i traim stretim tok na givim stretpela infomesen long pablik. Ol pipel bilong USA i bilip long toktok bilong ol saintis na dokta na i no mauswara bilong ol politisen olsem Trump.

Yumi tu long PNG i les long lukim ol politisen i toktok long coronavirus. Dispela hevi em i health issue, larim ol dokta i givim stretpela infomesen long pablik. Wok bilong politisen em long lobby long kisim mani bilong baim ol ikwipmen na marasin na strongim helt sistem long ol pablik haus sik long kantri.

Paul Hamangi

Badili, NCD