Tingting bilong KISIM BEK PNG i mas i stap long olgeta pipel bilong Papua Niugini. Planti i lukluk na sutim pinga long Praim Minista James Marape olsem em yet i mas mekim wok bilong kisim bek PNG.

Dispela wik gavman bilong em i mekim disisen long no ken surikim maining laisens bilong Barrick Niugini i go long narapela 20 yia na em i givim laisens i go long Kumul Mineral Holdings Limited. Dispela em i kampani bilong PNG gavman yet.

Gavman i mekim sampela bikpela disisen tu long senisim sampela lo bilong maining na sampela i no amamas long dispela. Bikpela askim i wok long kam nau em long wanem as tru na dispela gavman i wok long hariap long mekim ol bikpela senis.

Tasol lukluk i gut long dispela tingting bilong kisim bek PNG em i min wanem tru long yumi ol liklik manmeri? Ating em i min olsem yumi mas sanap arere na lukluk tasol?

Nogat! Gavman i laik kisim bek PNG em i min tu olsem yumi laik stretim ol pasin bilong yumi na seivim kantri bilong yumi long yumi yet na tu long ol arapela lain i laik bagarapim yumi.

Gavana bilong Oro Provins Gary Juffa i sanap strong long banisim ol bus na graun bilong em long provins bilong em. Planti yia taim em i stap olsem pablik seven em i bin lukim planti stil na paul pasin i kamap. Nau em i gavana em i go het long traim long stretim dispela ol pasin no gut. Em i no stopim bisnis. Em i tok olgeta bisnis I mas rispektim ol pipel bilong dispela ples na kantri na ol lo bilong dispela kantri.

Long Is Sepik Gavana Allan Bird i sanap strong long kirapim provins bilong em wantaim ol pipel bilong em. Em i sanap strong long tingting bilong strongim ol pipel long mekim wok long graun bilong ol yet na long wankain taim mekim mani. Taim em wantaim tim bilong em long Is Sepik provinsel gavman i tok no gat long Frieda Main ol i tokim Frieda go bek na stretim ol plen bilong yupela.

Long Pot Mosbi em I hat tru long pasim graun long wanem planti pipel i kam long siti na siti tu i gro hariap tru. Planti paul pasin i wok long kamap na planti asples bilong dispela siti i wok long lusim graun bilong ol yet. Bikpela hevi bilong dispela em ol asples yet i wok long hait na salim klen graun bilong ol.

Indai bilong yangpela sumatin long Tari Sekenderi skul long Hela Provins las wik i mas kamap olsem wanpela bikpela samting long dispela provins we i kamap pinis tasol em i gat planti wok tru bilong mekim em i kamap long sampela mak. Hela provins i gat olgeta samting – minerel risos, gutpela graun em i ris tru na i gat ol naispela ol pipel tasol em i wok long kilim em yet i stap. Olsem wanem bai dispela provins i sanap na rabim solda wantaim ol arapela bikpela provins?

Wok bilong bildim provins em i no isi tasol namba wan samting em i laik mekim em long bildim na strongim humen risos bilong en. Long mekim dispela em i mas was gut long ol sumatin bilong em.

Ol meri na pikinini long PNG i krai planti bikos ol i bungim planti hevi long haus. Man i paitim meri o bagarapim liklik pikinini meri. Long ol strit long Pot Mosbi na Lae namba bilong ol pikinini i slip long strit i go antap na long sampela kona i gat ol famili i mekim strit olsem haus bilong ol.

Sampela dispela ol famili i ranawe long pasin bilong saspek long posin na sanguma na ol i hait long ol strit long Mosbi. Pasin bilong kilim ol meri na sampela taim ol man na ol pikinini tu i wok long go bikpela tru long kantri. Olsem wanem tru bai dispela Kristen kantri i daunim na rausim olgeta dispela rabis pasin?

Taim yumi toktok long kisim bek Papua Niugini yumi toktok long yumi yet mas rausim ol paul tingting i stap long het bilong yumi na pasin bilong yumi. Yumi gat driman long wokabaut olsem kantri long narapela 45 krismas orait yumi mas stretim yumi yet pastaim.

Yumi stretim ol lo we inap lukautim yumi olsem wanpela kantri, yumi lukautim ol meri na pikinini bilong yumi na yumi toktok long wok bisnis we ol kaikai bilong en i stap long kantri na i helpim kantri.

Yumi gat wok long sapotim Praim Minista bilong yumi long kisim bek PNG!