LONG las 6-pela mun nau, planti ol sios helt senta long kantri i bin pasim dua bilong ol. Ol i mekim olsem bikos Nesenel Gavman i no hariap long givim mani bilong baim ol dokta na nes na ol saplai em ol i nidim long givim helt sevis i go long ol pipel bilong Papua Niugini.

Las wik Katolik Helt Sevis i bung wantaim Kristen Helt Sevis na tokaut olsem ol bai pasim sevis bilong ol. Bihain long dispela strongpela toktok bilong ol, Praim Minista James Marape it ok sori na promis olsem gavman bai givim K20milien.

Mista Marape i tok sori long gavman i no hariap long givim dispela mani i go long ol sios helt sevis long kantri.  

Pasin bilong bihainim tok promis insait long kontrak, em i bikpela sain bilong rispek na kamapim gutpela wokbung namel gavman na ol sevis provaida. Long dispela wok bung bilong Pablik Praivet Patnasip, nesenel gavman i givim mani na ol sios helt sevis i mekim wok bilong lukautim ol sikman na meri na pikinini na ol arapela helt sevis long ol pipel bilong Papua Niugini.

Dispela hevi bilong gavman i no givim mani hariap, i no nupela long ol sios helt sevis. Tasol long dispela yia, hevi bilong COVID-19 na ol wok redi bilong gavman, i rausim ol arapela obligesen bilong en i go long baksait. Na sios helt sevis em i wanpela bilong ol dispela. Long stat bilong mun Jun, Minista bilong Helt i bin tokaut long K45.5 milen baset bilong COVID-19 wok redi na olsem wanem ol i bin yusim dispela mani. Tasol gavman no bin luksave long bikpela sevis ol sios helt senta na haus sik tu i bin mekim long redi long COVID-19.

Long olgeta provins bilong Papua Niugini, i gat ol sios helt senta o haus sik i mekim wok bilong helpim ol sikman na meri. Ol sios i mekim dispela wok long moa long 100 yia nau. Nesenel gavman i luksave long en na i mekim agrimen long ol sios i bringim dispela sevis na bai gavman i givim mani bilong dispela sevis.

Mani ol sios helt sevis i kisim long gavman i save go long baim ol nes, dokta na arapela wokman na meri na ol marasin na ikwipmen na ol arapela wok bilong ranim ol haus sik na helt senta. Olsem na sapos i no gat mani, bai i no gat pe bilong ol wokmanmeri. Na sapos i no gat mani bilong baim ol wokmanmeri, bai ol i no inap wok na dispela sevis bai pas.

PNG i laki bikos planti ol helt sevis bilong sios i mekim bikpela sakrifais long las 6-pela mun. Long taim i no gat mani ol i mekim wok yet long givim sevis i go long ol pipel.

Helt na edukesen em tupela bikpela sevis gavman i mas go pas long en. Tasol long PNG, ol sios i mekim bikpela wok tru long kamapim ol dispela sevis. Sapos i no gat helt sevis bai ol pipel long ol ples longwe i kisim taim tru.

Yumi hop dispela mani Praim Minista i bin promis las wik i  go pinis long ol sios na bai inap long opim dua bilong ol haus sik na helt senta gen we ol pipel bai kisim helt sevis gen. Yumi hop tu olsem nesenel gavman i luksave long dispela hevi em i bin kamapim na bai i no ken mekim wankain asua gen. Laip bilong ol pipel bilong PNG i hangamap long helt sevis ol dispela helt senta bilong sios i save givim.