BIPO tru i gat wanpela brata na susa i save stap long wanpela ples. Nem bilong brata em Tepu na nem bilong susa em Kubiyibo.

Wanpela apinun Tepu i tokim susa bilong em long kukim sampela kaukau long paia na redi long em i karim i go long bus long moning. Tepu i tingting long go painim kapul long bus. Kubiyibo i harim tok bilong brata na em i kukim kaukau na putim long bilum.

Long bikmoning tru taim ol arapela lain long ples i slip yet, Tepu i kirap na kisim spia na banara wantaim bilum kaukau na em i wokabaut i go long bus.

Tepu i kilim namba wan kapul klostu long ples. Em i lusim i stap na i wokabaut i go moa na i kilim narapela kapul gen. Em i wok long kilim ol kapul na lusim i stap na i go moa insait tru long bikbus. Taim san i go daun em i wokim haus long bus na i laitim paia na kaikai ol kaukau em i bin karim i go wantaim.

Long dispela taim, wanpela kapul Tepu i bin kilim na lusim long bus, i no kapul tru. Em i wanpela masalai i bin tanim kamap olsem kapul. Orait dispela masalai i tanim na kamap olsem Tepu na em i go bek long ples. Kubiyibo i kirap nogut long lukim brata bilong em i kam bek hariap long apinun yet.

Dispela masalai i giaman na tok em i pilim sik olsem na em i no kilim wanpela abus na i kam bek han nating.

Masalai i go sindaun klostu long paia bilong Kubiyibo na susa i ting brata tru i sindaun wantaim em. Ol i sindaun i go na masalai i stat long mekim ol kain kain paul toktok na putim skin long Kubiyibo. Kubiyibo i kirap nogut na em i bikmaus long em, “Yu brata bilong mi ya na watpo yu askim laik long mi.” Tasol dispela masalai ya i no harim, em i wok long mekim ol paul toktok yet.

Meri ya i stat long krai na em i no pinis, em i krai i go i go inap brata tru bilong em i kam bek long bus wantaim ol kapul em i bin kilim long tupela de em i go raun long bus. Long taim Tepu i kamap em i kirap nogut long lukim susa bilong em i wok long krai i stap. Em i askim Kubiyibo tasol susa bilong em i no bekim, em i wok long krai tasol i stap.

Tepu i lukim olsem na em i tingting planti na i wari. Orait em i go kisim wanpela pik long banis na i kilim na wokim mumu. Long taim mumu is tap long graun Tepu i go waswas gut tru long wara na i rabim gris bilong pik long skin bilong em. Orait em i kam bek long ples na rausim mumu na i skelim i go long tupela hip. Wanpela bilong em na narapela bilong susa bilong em.

Tepu i kisim skel bilong em na i stat long wokabaut i go long bus. Em i lusim ples bikos em i lukim olsem susa bilong em i no laikim em tru na i no laik toktok wantaim em.

Kubiyibo i no harim wanpela nois ausait na isi tasol em i kam lukluk na em i lukim brata bilong em i wokabaut i go longwe pinis. Em i krai na singaut i go, “Yu no ken go, yu no ken go.” Tepu i lukim Kubiyibo i ran na singaut wantaim i kam long baksait na em i stop na wet.

Long taim Tepu i sanap i stap, san i hatim gris bilong pik long skin bilong en na gris i stat long ran i kam daun long lek na go daun long graun. Taim gris i kamap long graun em i tanim na kamap wara. Dispela wara i wok long kamap bikpela na i raunim bodi bilong em.

Kubiyibo i lukim na em i krai strong moa na stat long katim ol pinga long han bilong em. San i kukim gris long bodi bilong em tu na i tanim kamap wara long lek bilong em. I no longtaim wara i raunim bodi bilong em tu.

Tude dispela tupela raun wara i sanap i stap long bus bilong mipela.

Jack Terim

Panda Village

(Dispela stori i bin kamap long New Nation  June 1985)