WILL Genia i askim ol Papua Niugini long kisim veksin long helpim famili long stap seif . Will Genia em i wanpela PNG spot sta husat i pilai ragbi yunien long tim bilong Wallabies long Australia.

Dispela yangpela ragbi yunion sempian stap namel long grup bilong Pacific Ailan pipel husat i yusim pletfom bilong ol long promotim pablik helt toksave bilong COVID-19. Genia i tok em i pilim fri long tokaut egensim kain

kain giaman infomesen bilong veksinesen . Helt sistem bilong PNG i stap aninit long presa taim Delta strain bai bagarapim kantri na sosel midia i givim giaman infomesen long veksin. “I gat planti toktok bilong COVID-19 veksin bikos i no gat rait infomesen i kam aut ples klia,” Genia i bin tokim ABC Pacific Beat program. “Pipel i no save lukim TV, ol i no gat ekses long onlain long ritim nius o harim long redio olsem na

planti bilong ol infomesen i save kisim infomesen long narapela o sosel midia. “Mama bilong bin kisim COVID-19, brata bilong mi bin kisim COVID-19, mi gat ol kasen na pren husat i bin dai long COVID,” em i tok. “Dispela olgeta samting i brukim lewa bilong mi olsem na plis kisim veksin.

“Na mi ting mipela olgeta i save olsem sosel midia i save kamapim isi pletfom we olgeta i save long yusim.” Genia i bin pilai wantaim Australia Wallabies, Queensland Reds na nau em i sainim kontrak wantaim Japanese tim, ol Kintetsu Liners. Em i Embeseda bilong UNICEF na em i bin serim wanpela vidio bilong em long COVID-19 veksin long Facebuk . “Mi ting gutpela rot long protektim mipela yet na ol famili bilong mipela em long kisim veksin,” em i tok.