TYSON Fury i autim Deontay Wilder las wik na i winim gen dispela WBC heviwet taitel bilong em long Las Vegas, Nevada.

• Tyson Fury i no gat wanpela man i winim em yet na profesenel rekot bilong en i sanap olsem 31-0-1
• Wilder i bin paitim Fury i go daun long namba foa raun bilong dispela pait.
• Deontay Wilder, i no laik luksave olsem Fury i winim em na em i namba tu taim bilong em long lus long wanpela pait.

Fury i bin nokim aut Wilder long 1:10 long namba 11 raun bihain long tupela wntaim i bin pait i go na i bin pundaun tupela taim bipo long dispela nokaut. “Long bihain taim, bai ol pipel i lukluk bek na tok dispela em i wanpela gutpela pait tru,” Fury i tok long ring. “Mi em WBC sempion, Ring Sempipon na lineal sempion. “No ken lusim ting long dispela. Long taim hevi kamap, bai mi win yet.” I no gat tok long dispela. Fury i soim ples klia olsem em i wanpela sempion boksa bihain long dispela gutpela pait i bin kamap long Las Vegas.

Wilder i bin stap isi long dispela wik. Em i no bin bekim ol toktok Fury i bin mekim long sutim bel bilong em. Bipo long tupela i go insait long pait em i bin tok olsem, “Long taim mi stap isi, bai tingting bilong mi i klia na mi ken wokim gutpela disisen.”

Deontay Wilder i soim kala na stail bilas bilong em bipo long tupela boksa i go insait na pait. (Getty: Al Bello) Long taim Wilder, i kam insait long ples bilong pait em i bilas long kala na stail bilong em yet, tasol Fury i danis i kam insait long musik bilong AC/DC, You shook me all night long, nae m i bilas olsem wanpela soldia bilong Rom. Ol tupela i tromoi toktok i go i kam inap ol i go insait na statim dispela pait em ol i bin wet inap long 20 mun long testim strong bilong wanpela narapela. Wilder — hevi bilong en inap long 107.9 kilograms — i wok long tromoi han long Fury long namba wan raun na fosim Fury long stap longwe long dispela raithan bilong Wilder we i bin nokaim em aut planti taim pinis. Tasol Fury tu— hevi bilong em inap long 125.6kg — i givim wanpela strongpela raithan long Wilder na nokim em i go daun.

Tyson Fury (raithan) i bin pundaun tupela taim tasol em i bin strong tru long dispela pait. (Getty: Top Rank Inc/Mikey Williams) Wilder i kirap gen na i no westim long salim Fury i go daun long plua tupela taim long namba foa raun. Wilder — husat i bin difendim taitel  10-pela taim olsem wanpela heviwet sempion, i wok long putim was long taim em i tok long tromoi han long bodi bilong Fury. Fury i wok long putim strongpela was tasol long taim Wilder i wok long painim rot bilong nokim em i go daun long plua. “Em i bin givim taim stret long mi,” Fury i tok. “Mi nambawan long wol, na em i namba tu tasol.” Dispela tingting i helpim long strongim Fury tasol e mi wok long putim was long strongpela han na rait huk bilong Wilder. Strong bilong Fury na hevi bilong em tu i stat long mekim Wilder i sotwin na slo daun liklik. Wilder i no inap long sanap stret na long namba 10 raun em i go daun bihain long Fury i tromoi rait han long em.

Pait i pinis bihain long nokaut na referi i stopim dispela pait. (Getty: Al Bello) Wilder i bin kirap gen, tasol em i no inap kirap long namba 11 raun long taim Fury i salim em i go daun na referi i stopim pait bipo long bodi bilong Winder i paitim plua. Wilder, husat i bin givim kain kain ekskius long taim em i bin lus bipo, i lusim ples bilong pait hariap tru na i no laik luksave olsem Fury i winim em. “Dispela Deontay Wilder i no laikim mi. Na yu laik save? Bikos mi winim em tripela taim,” Fury i tok. “Mi wanpela spotman, mi go long soim em olsem mi laikim em, tasol em i no laik soim wankain pasin. Wari bilong em. “Bai mi pre long em na God i tanim bel bilong em.” Fury i no tokaut long wanem samting em bai mekim nau. Tasol bai i gat rimets namel long Oleksandr Usyk na Anthony Joshua long WBA, IBF, WBO na IBO belt. Tasol sapos em i winim Otto Wallin bilong Sweden long dispela mun, bai em i mas difendim dispela WBC belt bilong em wantaim wantok bilong em Dillian Whyte.