POT Mosbi Strikers FC Ismael Pole i laik divelopim ol yangpela gol kipa insait long kantri. Wantaim ekspiriens bilong em long gol kipa Ismael i rejistarim Pikinini Gol kiping Klinik aninit long Investmen Promosen Atoriti (IPA) long givim ol skil bilong gol kiping trening long mekim ol laik long pilai long posisen bilong gol kipa. Namba wan program bin kikov long tem 3 skul holide long Septemba 20 - 24, 2021 long Sir John Guise Utility Oval long Pot Mosbi. Pole i tok olsem em i amamas long tripela de kosing sesen na em i tingting long ranim dispela program long ol narapela hap insait long kantri. “Mi no laisens kosa tasol mi laik serim ekspiriens bilong mi long ol pilaia husat i ken pilai long dispela posisen long bihaintaim,” em i tok. Pole i tok wantaim K70 fi long wan wan pikinini i gat 10-18 krismas i ken kisim trening. Moa long 50 yangpela pikinini man na meri i putim nem pinis long stap insait long dispela trening program. Tasol taim ol i senisim ples bilong trening long Bisini i go long Sir John Guise Stedium tupela man tasol i kam. Brython Kasman na Maino Killian i kamap olsem namba wan lain bilong program. Em i tok olsem dispela program em i bilong bildim las difens bilong tomoro. Program we bai bildim Pot Mosbi Strikers FC long provaidim ikwipmen na mekim ol i lukluk long hau yumi inap lukluk long bihaintaim bilong soka insait long PNG. Pole i tok em laik kisim dispela program i go painim sapot bilong ol koporet patnas long PNGFA i ken karimaut Pikinini Gol kiping program i go aut long ol narapela senta bilong kantri.

Joseph Dawai i raitim