KWIN bilong Long Jamp long Tim PNG Rellie Kaputin i bin las etlit long plai wantaim ret, blak na gol kala taim em bin kisim steig long De 9 bilong Tokyo 2020 Olimpik Gem.

Kaputin i bin las long resis long Tim PNG long de 3 bilong ol Etletik kompetisen

long Tokyo taim em bin soim insait long fil bilong ol wol klas etlit. Kaputim strongim bun bilong inap em pinisim tupela bilong tripela jamp long rekot olsem namba wan jamp bilong 6.40m long tripela raun. Em bin stap long 6.30m rekot long namba tu raun blong em bihainim wantaim 6.40m

long fainel jamp. Em bin 2 sentimita aut long sisen bilong em olsem namba wan jamp bilong 6.42m, we i bin kamap long Jun dispela yia. Kaputin i bin pinisim namba 11 long Grup A na pinis namba 19 aut long olgeta 30 etlit. Namel long dispela i gat 12 spes tasol stap long fainel wantaim 6.75m kwalifai mak rikwaimen bilong go insait long fainel. Kosa bilong Rellie Kaputin Philip Newton i amamas long gutpela pefomens bilong Rellie. “Rellie i bin salensim ol top etlit husat ol i save resis olgeta taim long diamond lig level. Rellie i bin amamas wantaim pefomens bilong em i no bin wankain olsem pefomens bilong em long Gold Coast 2018 Commonwealth Games we em bin lusim tripela raun olgeta. “Mi amamas wantaim pefomens bilong mi. Mi tingting planti tasol mi bin pulim sokis 6.30m jamp long namba wan jamp na mi bin amamas wantaim. Dispela em namba tu taim jamp long mondo trek na em trek mi no klia gut wantaim, olsem na taim mi jamp 6.40m em gutpela jamp bilong mi,” Rellie i tok. “Dispela i strongim mi long resis gen wantaim ol namba wan etlit na mi ken kisim dispela strong go long Commonwealth Games neks yia,” em i tok. Kaputim bai kam bek long PNG pastaim long tanim em go bek long Birmingham 2022 Commonwealth Games long Julai neks yia.

Jacklyn Kimala i raitim