Morata ov-sisen Ragbi lig kompetisen i wetim tok orait bilong Nesenel Pandemik Kontrola opisa long pilai gren fainel gem. Gem bilong ol man na meri tim bai kamap long Kone Tigers Oval long Waigani, Pot Mosbi.

Presiden Samson Metofa i tok ol i wetim Pandemik Kontrola David Manning long givim ol tok orait long kamapim ol dispela gren fainel gem.

Tasol Metofa i tok taim ol i stap insait long ristriksen bilong ol spot kompetisen planti hevi tu i wok long kamap bikos long COVID-19.

Em i tok planti bilong ol pilai long Morata ov-sisen kompetisen i save pilai long ol narapela kompetisen insait long Pot Mosbi siti, Nesenel Kapital Distrik.

Em i tok COVID-19 ristriksen i mekim hat long wan wan pilaia long trening na stap fit long pilai.

“Mipela laik dispela ristriksen mas pinis na bai mipela makim deit bilong pilai gren fainel tasol mipela i wok long mekim ol pilaia tingting planti long wanem taim tru bai ol inap pilai fainel,” Metofa i tok.

Dro bilong ol tim bai pilai gren fainel i olsem:

• Mens A gret-Gateway Sharks Vs Giburi Raiders
• Wimens-M2 Mumuts Vs Community Hall Tigers
• Anda 20-Talapia Magpies Vs Eastern Eels

A gret primias M2 Mumuts na wimens M3 Bulldogs i feil long difendim taitel bilong ol long dispela sisen.

Presiden i tok ol i bin laki tru long kisim sapot bilong Nesenel Kapital Distrik Komisin (NCDC) husat i bin givim ol K25, 000 long dispela kompetisen.

Metofa i tokaut tu olsem NCDC Wimens Komisina Elis Siki i mekim narapela K10, 000 komitmen long wimen kompetisen.

Morata ov-sisen em i fida klap bilong Kone Tigers klap we ol i save pilai long Pot Mosbi primia ragbi lig kompetisen.

Joseph Dawai i raitim