WANPELA yangpela Pro Boksa bilong PNG Junior Raka Kauko bai pait wantaim Filipino Boksa Roldan Aldea long putim PNG long wol mep na sapos em winim dispela taitel pait em bikpela histori long kantri bihainim namba wan Boksen bung we bai kamap long 25 Epril 2021.

Interim Presiden bilong PNG Boksen Kaunsil Ben Micah i tokaut klia long olgeta klap, trena na kosa long painim gutpela rot long redim ol boksa bilong ol long ol tu bai kam antap olsem Raka na pait long wol.

“Mipela i nid long holim o ogenaisim nesenel sistem pait long kantri na dispela i ken helpim mipela long trenim olgeta boksen long kamap wankain olsem ol intenesenel level,” Mista Micah i tok.

“Mi laik askim olgeta sponsa long kam long bod na sapotim ol yangpela boksa bilong PNG na ol i ken bringim bek nem bilong PNG long Boksen spot long olgeta PNG,” em i tok.

Pro Boksa bilong PNG Junior Raka Kauko i tok tenkyu long husat ol i bin sanap beksait long trening bilong em na kampani bilong em long lusim em trening long pait.

“Mi tok tenkyu long Oceania Fighting Promosen long kam insait wantaim kosa bilong mi long sapotim mi kam antap long dispela taitel pait,” em i tok.

“Mipela laik askim gavman long luksave long ol fesiliti bilong Boksen na bai ken helpim mipela long luk fowat long Boksen trening bikos mipela no inap go antap long intenesenel level sapos mipela no gat gutpela trening na redi gut long go pait wantaim ol,” Raka i tok.

Em i tok bikpela tenkyu long ol sponsa husat i sapotim dispela Taitel Pait na tu olgeta boksa, sapota na famili long promotim pait na divelopim spot boksen long kantri.

Jacklyn Kimala i raitim