MORATA Off-sisen Ragbi Lig kompetisen i bin ranim Kwata fainel bilong ol meri na man wantaim long las wiken long Kone Tigers fil.

Long kwata fainel top 8 meri tim i bin resis em top 4 bilong Pul A na top 4 bilong Pul B bilong 2021 sisen. 1^st na 2^nd tim i gat sans long meja semi-fainel tasim 3^rd na 4^th bai pait long hangamapim but o weri werim but wantaim ol arapela long dispela wiken meja semi-fainel.

Operesenel Menesa bilong Morata Lig kompetisen John Mawe i tok wina bilong 3^rd na 4^th bai salensim lusa bilong 1^st na 2^nd tim long dispela wiken.

Mista Mawe i askim sapos sampela ol bisnis haus na sponsa i laik kam long bod na helpim long tropi o mani tasol long nau mipela i gat sponsa bilong wan wan meri na man mets long ol fainel.

“Mipela i no painim wanpela hevi namel long sisen inap nau mipela stap namel long fainel, bikos mipela i tokim ol tim long no ken pait insait long fil,” Mawe i tok.

Mista Mawe i tok gren fainel bilong 2021 Morata Off-sisen kompetisen bai kamap long 21 Mas, 2021.

“Mipela i plen long sampela junia gem na tu long ol olpela pilaia husat i bin pilai long Morata Off-sisen long pilai keten raisa pastaim long ol gren fainel tim kisim fil,” em i tok.

Long las yia difending sempian em; Mumuts A-gret, Mountaina Roosters B-gret na ol meri gem i bin tait na ol bin holim tropi bek.

Jacklyn Kimala i raitim